إلى معالي وزير السياحة والآثار " كيف نحقق حلم ال30 مليون"
كتب د. عبد الرحيم ريحان
وصلت السياحة إلى رقم غير مسبوق فى تاريخ مصر المعاصر 19 مليون وهذه مجهودات دولة بأكملها وليست وزارة واحدة بالطبع وسبب هذه القفزة الهائلة هو افتتاح المتحف المصرى الكبير
أنقل لمعاليك خبر تتناقله وسائل التواصل الإجتماعى ربما يكون ما ذكر حقائق وربما جزء منها ولكن مصدر الخبر وكل من تناقله هم مصريون غيورين على مستقبل بلدهم ومستقبل الأجيال القادمة
الخبر مصدره الأستاذ باسم سمير والخبر نصًا كالآتى
الراجل ده بعد ١١ يوم ف مصر .. قالي ممكن أتكلم معاك ٥ دقايق .. قلتله طبعا ..
قعدت معاه هو و مراته ..
قالي .. باسم .. انتوا ازاي عايزين ٣٠ مليون و ٤٠ مليون سائح و بتقول مصر تستاهل أكتر من ال ١٧ مليون .. علي فكره أنا متفق معاك .. لا .. انتوا ع الآثار اللي عندكوا دي .. تستاهلوا ١٠٠ مليون .. بس إزاي ؟
هل إنتوا مستعدين ل كده ؟
و راح طلع ورقة صغيرة كاتب فيها الآتي :
خذ عندك ..
الترعة اللي مليانة زبالة علي امتداد طريق الجيزة سقارة .. ليه كده ؟
ازاي مكان زي القلعة فيه عدد ٣ ماكينة تذاكر منهم واحدة مش شغالة ؟
إزاي ف معبد الاقصر نقف ٤٠ دقيقة مش عارفين ندخل باركينج المعبد ؟ و هو ده اصلا باركينج ده ؟
إزاي مقبرة عظيمة زي كاجمني.. مفيش حاجز زجاجي يحمي الألوان اللي بقالها ٤٣٠٠ سنة ..
إزاي مفيش ساينات ف كل معبد بتحذر الناس محدش يلمس الحيطة ؟
انتوا ازاي مش خايفين علي الكنوز دي ؟
إزاي الجاردات اللي لابسين يونيفورم البوليس واقفين بيدخنوا عادي جوه ال تشيك بوينت ؟
ايه المدخل بتاع معبد حتشبسوت ده ؟ و شغالين فيه بقالكوا كام شهر و ليه مش بيخلص ؟
إزاي سايبين الغفرا ف وادي الملوك تعطل الطوابير و تشرح جوه و تصور الناس بالعافية و تاخد منهم فلوس ؟
إزاي ف كوم امبو مش عارفين نرسي ٤٥ دقيقة و كل المراكب بتتخانق مع بعض و مفيش لا ظابط و لا رابط ؟
إزاي ف معبد فيلة الباص مش عارف يعمل يو تيرن ف مكان ضيق لا يسع الباصات ؟
هل دي منظر حمامات ف معبد حتشبسوت و ع السد العالي و القلعة ؟؟
انتوا فرحانين دلوقتي بالعدد بس هل انتوا بتقدموا سيرفيس بجد ؟؟
طيب انتوا مش قلقانين ان الناس دى ترجع تتكلم علي فقر البنية التحتية و سمعتكم تبقي وحشة ؟؟
هو انتوا عندكم حد بيحط خطط مستقبلية و بيبقي عارف مقدما ان كمان كام شهر هيبقي عندكم الاعداد العظيمة دي و لازم تبقوا مستعدين ؟؟
انا بصراحة شايف انكم بلد عظيمة بس مجتاجين تفكير يشتغل بجد و يصون الكنوز اللي عندكم دي .
الراجل ده كان بيتكلم و دمه محروق بجد .. قالي انا بحب مصر أوي و يا ريت توصل صوتي لأي مسئول .
الأسئلة دي أنا مكنش عندي رد واحد عليها ..
فهل فيه حد عنده رد ؟؟
إلى معالى الوزير تتوجه حملة الدفاع عن الحضارة المصرية لمعاليك بإصدار بيان رسمي ردًا على ذلك فهذا سائح أجنبي ليس له أغراض معينة ولا طمع في منصب لدينا بل يتحدث من خلال إقامته في مصر وملاحظاته الذي أبداها للأستاذ باسم سمير وتناقلتها وسائل التواصل الاجتماعي.
وبدرورنا كمدافعين عن حضارتنا وحريصون على نهضة السياحة ببلدنا التي يتبعها تنشيط لكافة أوجه النشاط الاقتصادي في مصر نرفعها لمعاليك.
متمنيين الرد الرسمي على ما يثار مع كل الشكر والتقدير لمعاليك وتقديرنا لمجهوداتكم الكبيرة بإخلاص لتنشيط وتنمية السياحة في مصر .