على ضفاف نيلكِ
على ضفاف نيلكِ
قصيدة للكاتب والشاعر
عماد الدين محمد
على ضفاف نيلكِ
بترسى قصايدي
وأكتب كلامي
وأرسم عيونكِ
على ضفاف نيلكِ
بشوفكِ في فجركِ
وأسمع أذانكِ
وأرتل معاكِ
غناوي زمان
على ضفاف نيلكِ
هنا كنت ماشي
أشاهد جمالكِ
شامخة ومجدكِ
شاهد كمان
وناسكِ أصيلة
في الشدة معادن
تظهر وتبان
على ضفاف نيلكِ
أنزل لحالي
أغني وأدندن
يرد عم يوسف
عليَّ السلام
ودي الست خضرة
بعيشه الطازة
ودا عم جِرجِس
ينادي يغني
بلِيلِة زمان
يعدُي عليَّ
الأسطى زكريا
يخدنا في طريقه
للعتبة أوَام
على ضفاف نيلكِ
لسه يامصر جواكِ خير
وناسك ما تِعرف
غير السلام
تقابلك ببسمة
تنسيك همومك
أوعى تقولي يااااااه
كان زمان
دي مصر الكنانة
وأرض السلامة
محفوظة ليوم القيامة
إنجيلكِ و قرأنكِ
خير الكلام
على ضفاف نيلكِ
بترسي قصايدي
وأكتب كلامي
وأرسم عيونكِ
شمس تنوّر
كل الزمان .