ملخص حوار تريزيجيه في قناه الاهلي
كتب - خالد عصام
تريزيجيه : في مدرب في ناشئين الاهلي مش لازم اقول اسمه ده مكنش بيلعبني وفي الماتشات الودية كان بيطلع الاعيبة اللي بتعمل اختبارات وميرضاش يلعبني لحد ما حد في الخليج شافني وطلبني وخلاص حجزت الطيارة وهمشي لقيت كابتن علي ماهر وكنا قاعدين في غرفة الملابس وقالي مش هطلعك غير لما تمضي انا عارف انك بتحب الاهلي ونفسك تلعب وانا هديك فرصة وكملت في الاهلي واتصعدت فريق اول.
- قالوا لي سوف يتم تصعيدك للفريق اول فالمعروف ان مانويل جوزيه يكره الناشئين فكانوا مش بيصعدوا اي حد ، مانويل جوزيه قبل ما يمشي قالي انت احسن ناشئ دربته في حياتي.
- تريزيجيه : حلمي اني ارجع النادي الاهلي تاني.
- إسلام الشاطر : يعني انت في احسن دوري في العالم ونفسك ترجع !
- تريزيجيه : يا كابتن انا من وانا صغير وانا حلمي الأول النادي الاهلي وبعد الاهلي مافيش كورة ، ان شاء الله هرجع النادي الأهلي بس بعد معمل حاجة برة ويبقي عندي تاريخ في اوروبا.
- احنا عندنا في مصر الاعب اللي يروح الدوري التركي ده يبقي لاعيب عالي جداً ومافيش زيه اتنين بس لما انا روحت الكلام اختلف قعده يتريقوا ويقولوا شوف راح دوري تعبان وحاجات من دي انا بقي حطيت ايدي في ودني وكملت وعافرت عشان ابقي في استون فيلا من أكبر الأندية الشعبية في إنجلترا.
- اول مباراة ليا مع الاهلي كانت قدام الزمالك في افريقيا ساعتها كابتن حسام قالي هنستبعدك من القايمة ساعتها زعلت جداً ، بعدها جالي وقالي معاك غيار وكوتشي قولتله اه قالي طب اجهز عشان الطيارة اتعطلت بسعد سمير وهنضمك في القايمة بداله.
- ابويا كان زمالكاوي جدا جدا .. ولكن اخويا الكبير اهلاوي وهو السبب في اني العب للاهلي وده كان حلمي.
- بعد كأس العالم للأندية 2013 أبو تريكة قالي رقم 22 محدش ياخده غيرك بس أنا قولتله لأ أنا مقدرش عشان الناس هتفضل تقارني بيك وده رقم أسطورة وهيبقى صعب عليا.
- مخدتش مقابل عشان اطلع في قناة الأهلي؟ ده أنا لو أطول ادفع فلوس عشان أطلع في القناة هدفع.
- اخر مره كلمت ابو تريكة ؟
- تريزيجيه : من يومين، وهو إللي كلمني عشان يتطمن على اصابتي.
- لعبت في الدوري التركي واللي بيروح دلوقتي بيقولوا عليه عالمي.. ولما روحت قالولي أنت رايح تركيا عشان تاكل شاورما.
- فايلر كان ظالمني جدًا في اندرلخت ، وكان بيتكلم انجليزي وفرنساوي ، وانا ماكنتش اعرف اللغتين ، وكان بيتريق عليا ويخلي زملائي يضحكوا عليا فقررت امشي واروح موسكرون ، لاني مش جاي من فريق صغير ، وكان واخدها عناد معايا عشان مش فاهم لغته.
- حصل موقف كنا قاعدين بناكل ولقيت صلاح بيقولي عايز التيشرت بتاعك ، استغربت وبقوله عايز تيشرت قاسم باشا، قالي ايوة والغريب اني اصلا الوحيد اللي مطلبتش منه تيشرت بتاعه في ليفربول، عشان انا قولتله قبل كدة مش هاخد التيشرت بتاعك ده إلا وانا بلاعبك وقولت للنني الكلام ده، قولتلهم مش واخد تيشرتاتكم إلا وانا بلاعبكم في انجلترا وحصلت
واحد اخد سبعة وواحد اخد تلاتة، النني بعد الماتش بقوله هاردلك رد و قالي امشي يالا.
- خرجت من مصر وأنا لا أعرف غير هاي وباي وكنت دايما ماشي بورقة مكتوب فيها عايز اكل او عايز حاجة ولما اروح لحد اوريهاله عشان اخلص حاجاتي ودلوقتي الحمد لله بقيت
اتكلم انجليزي كويس.
