طوابع بريد بنبض قلبي
بقلم الشاعر : محمد ممدوح - القليوبية
زمان الحب كان كلمة
ومكتوبة ما بين جوابات
"بحبك يا عزيزة الروح"
وببعت لك كتير سلامات
ويوصلك جواب مني
مع حراجي اللي في البوسطة
وعلشان ألقاكِ وأوصلك
محتاج ليكِ ميتين واسطة
أشوفك واقفة في الشباك
تدوب عيني قصاد عينك
أنا أول محبينك
والحيّ كله عارفني وعارفينك
وأهديكِ ورود تشبه
في الجمال سِحر عينك
رقيقة في رقة الوردة
ندى بيسيل على الغصن اللي داب فيكِ
يا معاليكِ
سلامي لكل شيء فيكِ
وبدعي الله يخليكِ
رباط للحب يجمعنا
وجودك جنبي له معنى
وكل الخلق شايفانا وبيسمعنا
ويحكي عن حكايتنا
ويعمل منها قصة لفيلم
حلمت كتير أكون ليكِ
وأهو دلوقت وسط الحلم
عيونك وحدها مشهد
وبطلك فيهم أستشهد
وفي بعدك ببقى حد يتيم
ومن بُعدك قلبي أتنهد
جميلة حبيبتي أوصافك
ملاك ونازلة من الجنة
عشانك أولّع الدنيا
وعشانك برضه أستنى
سنين من عمري بهديها
لحبيبتي الحلوة إياها
وبحلم حلم يبقى قريب
أعيشه وأبقى وياها
سنين من عمري بجري لها
تغازلني وأغازلها
تغني لي وأغني لها
وأول إيد تمد لها
وأشيل ليها هموم العمر
وأبقى معاها وأشيلها
هكون لها أب يقويها
هكون لها توب يدفيها
هكون لها بيت بيحميها
وحياتي ودنيتي ليها
هكون كالشمس في نهارها
هكون كالماء في أنهارها
بيحيي كل شيء فيها
ويروي كل أزهارها
هكون صلصال في إيديها
بيتشكل كفخّارها
حلمت كتير أكون ليها
وأهو دلوقت أنا جارها
ببص في عينها وأتغازل
ملاك من الجنة أهو نازل
بيحيي اللي مات فيا
ويكون للحزن كالعازل
حبيبتي...
وصفت فيكِ كتير
ومش لاقي كلام تاني
عيونك كيف وأنا السكران
شربت ورجعت من تاني
بحبك... وإنتِ حباني
وعاشقك... وإنتِ عشقاني
بكون تايه وأنا بدونك
ومعاكِ إنتِ بلقاني
زي القمر ليلة اكتماله
زي القمر... آه من جماله
في الطلة تاخد القلب دوغري
والقلب يسأل إيه جراله؟