بحبك يا مصر
بحبك يا مصر
بقلم : د . صفاء مختار
والشمس طالعة في حضن أرض وهرم ونيل على ضفافه تميل الفروع ترتوى وترتمي في حضن دافي ومياه عذبه يحلم يدوقها مليون حبيب وحبيب .
لما تمشي في الشوارع شايف مأذنه لمسجد وقبة كنيسة وعود أخضر مغزول ضفاير وعيد يحتفل كل الحبايب به.
لما تروح معابد فيله والكرنك وتركب شراع وتسمع غناوي النوبة وتاكل قصب شهد مكرر يبقي تعرف أن أنت في أرض خير ومحبة وسلام.
وأوعى تنسى الأهرامات وطريق الكباش وقرية يونس وفنها الجميل فخار ملون عليه حكايات الفيوم وتراث شعبها الكريم وبورسعيد وسمكها اسكندرية والميناء والمنتزة والنخل فيها على الرمله مضلل وراسم خيال وظله والشماسى وأغانى حليم.
ووسط البلد والتوفيقية وأوعى تنسى خان الخليلي والقلعة وقصر محمد علي وشوارع الزمالك ومصر الجديدة وقصر البارون والضحكة رايحة وأغنية لثومة وقرص طعميه وشوية بليلة في الشتاء الصبحية.
والذكريات وتحية العلم وطابور الصباح والأذاعة المدرسية .
ياقلبي على البطاطا وصاحبها ينادي وأجري أدور على التين الشوكي وكباية شاي على كوبري عباس وتمشية في ممشى أهل مصر وكتاب في أيدي ونسمة هوا معدية.
وصورة لمكتبة اسكندرية ومتحف حضارة يبهر العالم وحدوته حلوة ومسرحية في الأوبرا ومدينة الفنون في العاصمة الجديدة وقلب واحد ونبض واحد علي حبها عايشين راضيين مكملين.
يامصر ياحبيبتي ياساحرة بجمالك كل الشعوب ياقلعة وحضن غالي وقلب عالي نبضه بكل ولادك وشبابك حتى بشيوخك ونيلك وزرعك.
زغروطة عالية لعروسة صبية وشاب طموحه في أرضه وحالف يعلي البنا طوبه طوبه عارف طريقه لأنه أبن الصعيد ووجه بحري أبن بلد جدع واعي لتاريخه عارف طريقه .
يا حلوة أنتى سمره وخمرية متزينة متحنيه ، عروسة محفورة صورتك وأسمك ورسمك في كتب التاريخ ومذكوره في أعظم كتاب .
مجمعة كل الحبايب على نهر نيلك سهرانين وحيرانين في عشقك وشمسك.
بحبك يا مصر.