مَرْحَبًا رَمَضَانُ
مَرْحَبًا رَمَضَانُ
بقلم : الكاتبة منال خليل
- رمضان مش مجرد شهر في السنة
ده حالة، روح، دفء بيسكن القلب، نور بيغسل الروح، ومحطة بنقف فيها مع نفسنا ونراجع كل حاجة.
هو شهر الفرح ، شهر الراحة رغم التعب شهر القرب من الله ومن كل اللي بنحبهم.
- كل حاجة في رمضان لها طعم خاص.
قرآن الشيخ محمد رفعت ، تواشيح النقشبندي وصوت الأذان اللي بيفكرنا إن الدنيا لسه بخير، سفرة الإفطار اللي بتجمعنا حوالين ضحكة واحدة ، لمة العيلة .. طقوس الفطار وصلاة التراويح، ريحة الياميش والفوانيس اللي بترجعنا لأيام زمان، صوت المسحراتي اللي بيحمل في نبرته حنين الطفولة، وحتى لحظات السحور اللي فيها سكينة غريبة.
من القفطان للعباءة و إسدال وجلابيه الصلاة الجديده وتهادي سجاجيد الصلاه والتسابق على توزيع التمر والعصير ساعة الفطار ، موائد الرحمن ، وزينه رمضان بالشوارع والبيوت، وسيدنا الحسين وقهوة الفيشاوي .
- في رمضان، بتلاقي نفسك أقرب من كل حاجة حلوة ، من دعوة في السجود بتطلع من القلب، من صدقة بتوصل لحد محتاج فتخفف عنه، من نظرة رضا في عين أمك وأبوك، من حب ودفء في لمّة الأحباب بعد التراويح.
- طبق الكنافة ،حبات القطايف السخنه اللي رايحه جايه بين الجيران ، العيش السخن وقدرة الفول ، الزبادي البيتي ولمه المسلسلات القبلات والأحضان اللي من القلب في العزومات البسيطه، وكل واحد في العيله جايب ولاده وجاي مع صينيه مكرونه فرن ولا كان رز معمر ، حاجات جميلة جدا وترضي وتسعد القلب .
- استمتعوا بكل لحظة فيه، عيشوا بركته املوا قلوبكم بالسعادة، وزي ما رمضان بيغسل ذنوبنا، اغسلوا قلوبكم من أي زعل أو خصام. رمضان فرصة للسلام الداخلي للابتسامة اللي بتيجي من جوه القلب
للخير اللي ملوش مقابل، للحب اللي مالوش شروط.
رمضان كريم عليكم جميعًا، ينعاد عليكم بألف
خير، وقلوبكم عامرة بالنور والسكينة والمحبة!قال رسول الله ﷺ : "إِذَا جَاءَ رَمَضَانُ فُتِحَتْ أَبْوَابُ الجَنَّةِ، وَغُلِّقَتْ أَبْوَابُ النَّارِ، وَصُفِّدَتْ الشَّيَاطِينُ"
رمضان فعلًا بيجري، وبيبقى من أجمل الأوقات اللي بنعيشها بقربنا من بعض، من روحانياته، من لحظاته اللي بتفضل محفورة في الذاكرة.
افرحوا بكل تفصيلة، من صوت الأذان اللي بيفكرنا بنعمة الوقت، لريحة الأكل اللي بيجمعنا، لضحكة العيلة حوالين السفرة لليلة بنقضيها في قرآءة القرآن والدعاء من القلب.
- سجلوا اللحظات مع احبابكم، خزنوا المشاهد دي جواكم، خلي قلبكم خفيف وبلاش تكشير ولا نكد، خلي رمضان كله طاقة حب ودفء .
وافتحوا قلبكم للخير يمكن دعوة صادقة بظهر الغيب تفتح لكم أبواب السعادة كلها.
رمضان كريم يا أغلى ناس، ينعاد عليكم بالصحة والفرحة والسكينة، وتفضل بيوتكم مليانة نور وقلوبكم مليانة طمأنينة وراحة بال .