الحب مش يوم .. الحب حياة
الحب مش يوم .. الحب حياة
بقلم : الكاتبة منال خليل
- عندما يكون الحب حقيقي وراضيِ مستقر بالقلب، لا تحتاج إلى تاريخ محدد للاحتفال به، لأن كل يوم هو عيد، وكل لحظة لطيفه تصبح ذكرى جميلة تُضاف إلى دفتر الحكايات... الحب في التفاصيل البسيطة في رسالة صباحية تنور يومك، في لمسة مطمئنة وسط الزحام، في نظرة تفهمك قبل أن تتكلم، وفي وجود ثابت يُشعرك بأنك لست وحدك في هذا العالم.
- عيد الحب مش مجرد يوم واتنين لابسين احمر وورد احمر مع دبدوب كمان أحمر في ضوء الشموع اللي ممكن تكون على شكل قلوب حمراء، الحب "الحب مش بس هو وهي.. الحب أوسع وأعمق"
الحب بيعدي جنبك كل يوم وأنت ممكن ما تاخدش بالك.
- الحب هو شخص يسندك لما تبقى تايه،الحب هو في أم مستنية ابنها يرجع عشان تطمن عليه ومحضره الأكل سخن هو في صاحبك اللي رغم كل مشاكله، أول ما تبعت له "أنا متضايق"، يسيب الدنيا ويرد عليك.
- الحب هو جدك اللي كل ما يشوفك يحكيلك نفس القصة للمرة المية، وأنت بتسمعها بنفس الشغف عشان عارف إن الحب الحقيقي هو اللي بيفضل عايش حتى لما الذاكرة تبدء تخون.
- الحب هو إنك تحب نفسك، تشوف جمالك حتى لو الميزان عنده رأي مختلف!!!
الحب إنك تسمع أغنية حلوة وتغني معاها بصوت نشاز بس بروح فرحانة
الحب في قهوتك الصبح اللي ريحتها تفوقك وتنعنش مزاجك، في الكتب اللي تاخدك لعوالم بعيدة، في مكالمة مع صاحب قديم ترجّع لك أيام كنت بتضحك فيها من قلبك.
- الحب في الكائن الصغير اللي مستنيك على باب البيت يهز ديله عشان بس شافك الحب في الجارة اللي بتبعت لك طبق كيك .. وياسلام لو محشي علشان عارفة إنك مش بتطبخ، في الغريب اللي يبتسم لك في الشارع بدون سبب.
- الحب مش لازم يكون بصوت عالي أحيانًا بيكون في التفاصيل الصغيرة اللي بتدفي القلب.
فبلاش نحصر الحب في يوم واحد .. بوكيه ورد أو دباديب حمرا.. الحب موجود في كل لحظة حوالينا، بس المهم إن قلبنا يكون مفتوح يشوفه!
"الحب مش بس هو وهي.. الحب أوسع وأحن"
- الحب مش مجرد هديه ورسالة على الواتساب.. الحب هو الأمان اللي تحس بيه في حضن أمك لما الدنيا تضيق عليك، هو ضحكة أبوك اللي تخليك تحس إنك لسه صغير مهما كبرت، هو نظرة جدتك وهي بتدعي لك قبل ما تنام، وهو لمعة الفخر في عين ابنك لما يسمع اسمك بيتقال بإنجاز.
- الحب هو صديق يكلمك من غير سبب بس علشان حس إنك محتاج حد يسمعك، هو اللي يفضل معاك وأنت بتحكي نفس القصة للمرة العاشرة، ويعمل نفسه سامعها لأول مرة.
- الحب هو اللي يعدي عليك آخر اليوم بس علشان يقولك: "عامل إيه؟" وهو عارف إن الإجابة مش مهمة، بس وجوده هو اللي يفرق.
- الحب في طفل صغير يجري عليك وهو فاتح إيده عشان تاخده في حضنك، الحب في يد بتتمسك بيك وانت بتعدي الشارع في بنت صغيرة بتكسر الحصالة عشان تشتري هدية لمامتها، في صوت أخوك الصغير وهو بينادي عليك من آخر البيت عشان يشاركك لعبته، أو فرحته .
- الحب في لمة الحبايب والعيلة، في علبة الكحك اللي تلاقيها عند جارتك كل عيد
في طبق شوربة سخن يوصلك وانت عيان
في "كل سنة وأنت طيب" من حد بعيد عنك بس لسه فاكر يوم ميلادك.
- الحب في الجدع اللي يساعدك ترفع شنطتك وأنت طالع السلم، في البائع اللي يقولك:
"خد الحاجة وجيب الفلوس بعدين"
في الكمسري اللي يسندك لو القطر اتحرك فجأة.
- الحب في المطر اللي يخليك تفتكر ذكريات حلوة، في الأغنية اللي تفضل تدندنها وأنت مش عارف ليه، في العطر اللي يمر عليك في الشارع ويرجعك لزمان في صوت ضحكة أمك وهي بتحكي قصة حصلت لك زمان وما زالت تضحك عليها.
- الحب مش لازم يكون ورد وشموع، الحب موجود في كل تفصيلة صغيرة.. في اللمة الحلوة، في اليد اللي تمسح دمعتك، في الكتف اللي تسيب عليه همومك، في الباب اللي يتفتح لك وقت ما الدنيا تتقفل في وشك... الحب مش حاجة بندور عليها الحب حوالينا في كل لحظة.. بس محتاج قلب شايفه وعين بتعرف تميزه.
فلا تبحث عن الحب في التواريخ، بل ابحث عنه في الشخص الذي يجعل كل يوم في حياتك مناسبة تستحق الاحتفال، في قلب يعرف قيمتك، ويرى فيك نصفه الآخر ويريدك دائما كما أنت، بكل ما فيك، وبكل حب.