جسمك مش ملكك
كتب - د.ضياء الرفاعي
جسمك مش ملكك !!
يا عم انت بتقول ايه ... امال ملك مين يعني انت بتهرج صح .
لا ابدا والله تعالي أوضح لك وكمان هعرفك ازاي ترجع ملكيته لك تاني .
في دراسة اتعملت في جامعة هارفارد وتم نشرها من فترة قريبة ،الدراسة دي استمرت مدة طويلة جدا اجيال من الباحثين وأجيال من البشر .
مفاد هذه الدراسة ان الجسم مش بينسي الأحداث اللي بتحصل له من أفراح أحزان مواقف مختلفة.
فمثلا : كم مرة كنت راجع من اللعب وانت صغير ورجلك مش نضيفة ومامتك وقفتك علي الباب وقالت أوعي تدخل وتدوس علي السجاد رجلك خزنت الكلام ده واحتفظت بيه لغاية النهاردة.
كم مرة كنت هاتمد ايدك علي الأكل وانت في زيارة مع عيلتك لأحد الأقارب وأبوك بصلك ( زغرلك ) البصة دي في ذاكرتك إلي اليوم.
وحتي انك بتطبق نفس الطريقة مع أولادك فالجسم مش بينسي .
نرجع بقه للموضوع الرئيسي ان جسمك مش ملكك.
اسأل نفسك كده امال ملك مين ؟
احتمال تكتشف انك عشت طول عمرك عامل عقد ملكية جسمك لحد تاني أبوك أمك المجتمع.
الناس اللي ماشية في الشارع !!
نوضح أكتر
في ذكريات تكونت داخلنا منذ الصغر لمواقف مختلفة وكبرت واستمرت معنا طول حياتنا .
هناك الكثير من الأمراض النفسية المنتشرة في مصر وعند كثير من الناس .
المريض بيشتكي فيها من آلام وأعراض جسمانية لكن سببها الحقيقي بيكون نفسي مش عضوي .
الأمراض دي بتنتشر في المجتمعات اللي بيكون فيها التعبير عن الألم النفسي غير مقبول علشان عيب غلط ايه المحن ده انت عارف الناس ممكن تقول علينا ايه
فيضطر الجسم انه يعبر عن الألم النفسي بطريقته الخاصة .
علي سبيل المثال لا الحصر :
اللي شعرها يقع بدون سبب طبي واضح
اللي يجيله حساسية جلدية من غير أي تفسير.
القولون العصبي ومشاكله الغير واضحة
كل ده بيوضح ان جسمك مش ملكك جسمك بيخزن آراء ومواقف حصلت علي مدار عمره وبيترجمها لأمراض.
ازاي تلغي عقد ملكية جسمك مع الآخرين
بلاش تتعامل مع جسمك علي أنه( ثور ) في ساقية تحمل عليه وما تسمحش له بالراحة والاستجمام هيخونك في يوم من الأيام.
عيش اللحظه بلاش كل لما يحصل موقف يضايقك تسترجع كل المواقف اللي ضايقتك قبل كده وتجدد عقد الملكية.
دور في حياتك علي العلاقات الطيبة علاقات فيها حب تراحم تفاهم علاقات فيها الطرف الآخر موجود في عز الأوقات الصعبة.
وطبعا قبل كل ده ربنا لازم يكون طرف ثابت في حياتنا نقرب منه نحس بوجوده معانا نتقي الله في بعض .