رسالة للغايب
رسالة للغايب
بقلم الكاتب والشاعر
عماد الدين محمد
دي رسالة
للحبيب اللي غاب
بلغوه أني تايه في الشوارع
بدور عليه في كل وش
بسأل كل يوم جيرانه
رجع والا لسه
بلغوه كمان
أني بقلب في الرسائل
وأسرح في عيونه
اللي بتقولي كلام كتير
منا قلتلكم حبته
حب جنون
بقيت أبات وأقوم
على صوته وصورته
وأكلم نفسي عادي
مجنون !!!
بلغوه أن الليل طويل
وبسرح في الهموم
وشريط الذكريات
كل يوم يدور
وساعات انده عليه
وأصرخ بعلو صوتي
أفوق وأقول لنفسي
إسكت يا مجنون!!!
بلغوه
إني في منفى
وبينا الحدود مقفوله
بحر ورمال وسراب
بس لسه الشوق جمعنا
والوعد والأماني
بشوفه في منامي
روح لروح تعاني
وسؤال على طول في بالي
هانتقابل تاني؟
والا خلاص ممنوع
مكتوب عليه اتوه
في دنيا كلها غيوم
رفضه تكون لينا
بترقص على همومنا
تمسح الحكاية
وكل ذكرى ولون
دي رسالتي للحبيب
بلغوه إني قربت أغيب
والعمر اللي عدى
خلاص مش جاي تاني
والحلم زي الكبر
قرب خلاص يشيب.