الفنان أحمد عزت يروي عن أول لقاء مع الفنان الراحل نور الشريف في ذكرى وفاتة
في ذكرى رحيل الفنان نور الشريف
كتبت - شيماء محمود
ويقول الفنان أحمد عزت ، في ذكرى وفاة الفنان الكبير أستاذنا نور الشريف أحب اقول الظروف والملابسات اللي جمعتني به في مسلسل رجل الاقدار .
وكان سنة ٢٠٠٤ تقريبا أبلغني صديق في مجال الفن أن أستاذ نور الشريف بيقرأ مسلسل وعايز شباب يقروا معه الشخصيات
وفعلا ذهبت لاقيته مسلسل لغة عربية أسمه رجل الاقدار وأخذت شخصية من الشخصيات بالصدفة
وكانت محمد بن عمرو بن العاص
يعني ابن الفنان نور الشريف .
وذهبت أكتر من مرة وكنت كل مرة أقرأ نفس الشخصية وكنت كل مرة أقول يارب تكون الشخصية دي من نصيبي .
وفي مرة قالوا لنا شكرا يا جماعة الأستاذ اكتفى وهانبقى نكلمكم لو احتاجناكم تقروا تاني .
وبعد ٦ شهور تقريبا عرفت أن في مخرج جديد للمسلسل وهو الأستاذ وفيق وجدي رحمة الله عليه ، قلت خلاص مافيش نصيب بقى.
وبعدها بفترة كنت باعمل مسلسل في صوت القاهرة وبعد ما خلصت مشاهدي لاقيت الأستاذ الكبير ياسر علي ماهر منتظرني برة
قاللي انت مين ؟
قولت : أنا أحمد عزت حضرتك
فقال لي : أنت ممثل كويس اوي يابو حميد
فقلت : ربنا يخليك يا استاذ دي شهادة اعتز بيها والله
قال : فاضي بكرة تقابلني في الهرم
عند نزلة السمان
قلت له : حاضر .
تاني يوم قابلت الأستاذ ومن غير ما أستفسر كتير رحنا نزلة السمان دخلنا استديوهات الجابري
الأستاذ دخلني مكتب لاقيت أساتذة كبار موجودين
أستاذ وفيق المخرج
وأستاذ حسني صالح
مدير التصوير وقتها والمخرج حاليا
وأستاذ عمرو الجابري
منتج العمل
أستاذ ياسر قالهم الراجل دة هايل وعلى ضمانتي ومشي.
أستاذ وفيق قاللي إزيك إزيك إزيك يا أحمد احنا بنعمل مسلسل أسمه رجل الاقدار
أنت هتعمل محمد بن عمرو بن العاص
فاضل بس اني أقول أن الأستاذ نور الشريف له أيادي بيضاء على كل شباب الوسط اللي اتعاملوا معه وكان مش لا يبخل على أي حد بتوجيه أو إرشاد
ويكفي اني اقول اني لما اضطرتني الظروف وإبتعدت عن المجال الفني في ٢٠٠٥ والاستاذ عرف زعل جدًا ولما عرف مكان عملي وكان بالصدفة قريب منه زارني أكتر من مرة علشان بس علشان يتطمن عليه .
رحمة الله عليك يا أستاذنا وأسكنك فسيح جناته .