أخطاء يجب تصحيحها
.jpg)
كتبت : فاطمة عبد الحافظ محمد الامير
نقوم بإخبار أبنائنا بأننا نصوم لنشعر بمعاناة الفقير .
ابنك عايز يشرب لأنه مش شايف إن فيه حكمة من العطش !
لو بنصوم علشان نحس بالفقراء ... فكفاية إننا ما ناكلش ، ليه ما نشربش ؟
وبعدين الفقراء كمان بيصوموا ... طب بيصوموا علشان يحسوا بمين؟
الحقيقة الولد عنده حق .
فكرة إن الصيام هدفه إننا نشعر بالفقراء فكرة غلط ١٠٠٪
ما فيش آية في القرآن بتقول إننا بنصوم علشان نحس بالفقراء .
الفكرة دي بتطلع ملايين فاهمين إن الصيام مجرد تكدير وعكننة .
شوية جوع وعطش وصداع ... كان ممكن نحس بالفقراء بطريقة ثانية غير كدا .
ودي كارثة لأننا بنخسر الهدف الوحيد من الصيام .
ولما الهدف يضيع منك هتتعب أكتر لإنك مش فاهم حكمته .
علم ولادك إن الصيام مفروض علينا علشان نتعلم نتحكم في شهواتنا .
علم ولادك إن الصيام مفروض علشان ندرب نفسنا ع الصعب .
علم ولادك إن الصيام بيمنعنا من شهوات حلال علشان بعد كدا ترك الغلط والمعاصي والحرام يبقي سهل .
علم ولادك إن الصيام اللي بيمنعك من الحلال وانت بتقوله سمعًا وطاعة هو دا قمة الخضوع والاستسلام لله .
علم ولادك إن التسليم المطلق لله من غير ليه وازاي هو ده اللي احنا اتخلقنا علشانه.
علمه من دلوقتي علشان الموضوع هيبقى أصعب بكتير لو كبر من غير ما يتعلم.
اللهم إجعل أطفالنا صالحين مقربين لله وسند لنا فى الكبر .