" العم حرنكش"
بقلم الكاتبة / منال خليل
أنت ياعم
- الله لا يسيئك سيبني شويه
- لا مقدرش
الله ياخلىّ !! هو اليوم ايه ؟
- اليوم صعب
ياعم روووق طب ماهو عادي
- تعبنا ، بكينا ... زعلنا شويه
برضه اهو عادي
- واللي حبيته !!
معلش حبيبي يمكن سابك وقت المحنة
والله لتنسى أيامه وكمان احواله وبكره حيرجع تاني
حتشوفه عادي
ماهو أصله كان عادي
- بقولك ايه !
- عايز أيه !!
- تعالى نسند على شجرة .. نلعب سيجة
ونخطف ضحكة من أقرب نسمه
ناخدها و نجري على أول مرسى
وقلب حنين
نرمي همومنا في حضن عينيه
حيهونها علينا ماهو أصله كتير طيب
وده فى الناس عادي
- النهارده بس يعدي خليه يعدي
و اراهنك نرجع نضحك ننسى ونرقص نلعب تاني
نسعد تانب الروح تهدي الليلة حتعدي
نروح فالنوم ويمكن نحلم حلم لطيف
ماهو ممكن عادي
- بلاش بقى تتنهد
وعلىّ الصوت، بتقول أيه !!
قلبك واجعك شغلك تاعبك حبيبك سايبك
صاحبك باعك فلوسك خلصت !!
" طب ماهو عادي "
- بقولك ايه رأيك نخبي وجعنا
في ليلة امبارح
و لما يضوي الضو نرفع راسنا لأجمل شمس لسماء حرة
ونقوم ندعي ونجري
نشقى شوية معلش حنتعب ونبدء تاني
طب ماهو عااادي
ماهو الله كريم وده طبعا عادي
- شوف اما اقولك
والله لنرجع نفرح ونحب
نجرى نهزر ونكركر على روحنا ونطيب خرابيش روحنا نساوي حياتنا و ننسى وجعها
يالا أهو عااادي
- طب ايه رأيك ... نتقابل على قهوة وفنجان قهوه !!!
قاعده طاولة حجرين شيشه
ومفيهاش حاجه نحلي بسحلب
من عم ابو تعلب
" وكله يهون طب ماهو عادي "
- لا حقولك
ما تيجي نأجر عجلة وناخد لفه وكمان لفه
ده الجو جميل والناس أحلى
تاخد حضن !
لا هات كفك والله انت جميل
- والنبي تيجي ده بيتنا اهوووه
- امك طابخة ؟!
- يووووه ده فيه باميه وكمان لحمه
- الله عليها ... حاج أحمد اهوه
وكمان عيسى
- يبقى حنطلع ده اللمة حتحلى
- عالطبليه !!
- وبعدين شاي في الخمسينه !!!
- عندك منقد ؟؟
- ايون طبعا ... ما نجيب فاكهة
- وكمان لب
- من عم حرنكش !! ده بيلعب عود
طيب حلو وكمان مزيكا
- انت ياواد !!
- أبوك بينادي
- يالهوي البامية حتبرد .. يالا بسرعة
- الله الله المزاج أهو راق
- شفت ازاى، دي الدنيا بسيطة
ايوة جميلة