تشققات تابلوهات السيارة
كتب - مصباح محمد
إنتشرت الفترة الأخيرة شكاوى كتير من اصحاب العربيات الجديدة
منها كيا سبورتاج هيونداي توسان هيونداي النترا تويوتا كورولا و غيرهم
و عشان العربيات الجديده الخامات فيها بقت أحسن و فيها سوفت تاتش بتكون الشكوى إن ظهور تشققات في جلد التابلوه.
و للأسف الحل في كل الحالات دي بتكون بتغيير التابلوه بالكامل.
كتير من الناس بدأت تطلع اشاعات ان ده عيب صناعة و مشكلة التوكيل .
حبينا نوضح سبب المشكلة اللي بتخلي التابلوه يشقق و يجير و لونه يتغير .
ده مش سبب عيب صناعة اطلاقا السبب فينا احنا كيف هذا ؟
كل واحد مننا بيروح لأى مغسلة عشان ينضف العربية و هوب يقوم عامل المغسلة راشش عالتابلوه ملمع و يخلي التابلوه بربرق ده طبعا غير الريحة الحلوة الجذابة و بيعمل كده تقريبا في كل العربية من جوه
الملمعات دي بكل أنوعها رديء جداً كلها كيماويات بس مش دي المشكلة
المشكله بعد كده في الشمس
الشمس بتتفاعل مع الملمع عالتابلوه
و بينشف الجلد الصناعي بتاع التابلوه
و بيخلي الجلد يتشد و بعد فترة قصيرة يبدا تظهر التشققات.
انا عايز اقولك ان الملمع ده بيدمر البلاستك كمان زي في الصور هنلاقي قزازه العداد شققت و جيرت بشكل غير قابل للإصلاح.
نصيحه اوعى تستخدم ملمعات التابلوة
ايا كان نوعها.
استخدم ميه و صابون معتدل للتنضيف
و نشفها بفوطه مبلوله بمياه عادية .
لو في المغسلة العامل حط الملمع بسرعة بفوطه مبلوله امسح كل الاثار لو فضل الملمع موجود مع الشمس الجلد هيتاثر.
بلاش الملمعات ايا كان نوعها اصلا التابلوه شكله احلى و هو مطفي المنظفات الجيدة هى اللي تنضف التابلوه و تديه المظهر المط الجاف مش اللامع كانك داهنه فازلين.
و كويس اننا جيبنا سيره الفازلين بلاش خالص نحط فازلين عالتابلوه هو مش مضر لواحده المشكلة في الشمس و الحرارة بيحصل نفس قصة الملمع .
لو عايز تحافظ على مظهر عربيتك
و سلامة التابلوه و الاجزاء الداخلية يبقى نبعد عن الملمعات .