"قصة حياة الفلوس"
بقلم : امنية مشاضي
زمان مكانتش الفلوس الورق اللي في ادينا دلوقتي موجودة
كان في حاجه اسمها" المقايضة"
أنت عندك فراخ أنا عندي جبنة نبدل مع بعض كل اللي عنده حاجة يعرضها وكل اللي محتاج حاجة يطلبها .
الكلام ده تمام وماشي بين بيوت في القرية الصغيرة لكن بين القرى وبعضهم كان الموضوع صعب و بين الدول اصعب
كمان كان في مشكلة ان في بعض السلع صعب تخزينها وفي سلع صعب تقسيمها
و سلع صعب حملها و التنقل بيها
و في سلع مش كلو عاوزها او محتاجها
والمشكله الاكبر كانت تحديد الكام من ده بكام من ده .
لحد ما اتفق الناس على استخدام سلعه وسيطة.
" نقود سلعية" الكل يقبلها و لها قيمة معتبره ثابته نسبيا و محافظة على نفسها ومعمرة و كل منطقة اختارت السلع المناسبة ليها تقييم منتجاتها بما يعادلها
و الدفع يكون بيها .
زي مثلا جلود الحيوانات او المواشي في المناطق الرعوية ، او ادوات الصيد في المدن الساحلية .
و فضل الامر يتطور لحد ما اصبحت النقود المعدنية و تحديدا الذهب و الفضة هي اللي تم الاتفق عليها و ساد استخدامها
و تقييم كل شيء بمقدار منها و كل واحد بقى عنده شوية دهب بيشري و يبيع بيهم
و بعدين بقت مصكوكات معدنية منظمة
و لها شكل وختم و قيمة معروفه عن طريق الدول و الحكومات.
بس فضلت مشكلة واحدة
صعوبة التخزين و الخوف من خطر السرقة خصوصا مع رواج التجاره الخارجية بين الدول .
ودي كانت بداية ظهور فكرة البنوك
بيوت المال
اماكن موثوقة كل اللي معاه ذهب يروح يشيله هناك و ياخد "ورقة " تثبت قيمة الذهب اللي معاه ولما يحتاجه يروح يقدم الورقة دي و ياخد الدهب بتاعه .
الورقة دي اسمها البنكنوت بنك + نوت
مع الوقت الناس اتعودت تتعامل بالبنكنوت و تظهره ( يعني تكتب على ظهر الورقة ان الذهب المستحق بالورقة دي بقى ملك فلان زي ما بيحصل في الشيكات انهارده )
و فلان ده يستخدمها بنفس الطريقة و هكذا مابقاش ناس كتير تطلب دهبها من البنوك
( زي دلوقتي بقينا ماشيين بالفيزا وسايبين الفلوس في البنك)
ومن هنا ظهرت اهمية سيطرة الدول على البنوك من خلال البنوك المركزية اللي بتدير عمل البنوك دي و طبع الفلوس و ادارة الاحتياطيات .
بعد كده الدول طلعت قرارات ان اوراق البنكنوت دي "نقود الزامية" و تحل محل المعادن في الوفاء بالالتزامات، ومن هنا ورقة البنكنوت دي بقت مهمه و الناس راحت تشيلها كمان في البنوك (زي ما احنا بنعمل دلوقتي)
قام جماعة البنوك قالو طب الدهب و الورق المتلتل ده فين وفين لما حد بيسأل عنهم ، ما نديه قروض للناس وناخد عليها فوايد "نقود الودائع "
وطبعا البنوك المركزية بتنظم العمليه دي
( وظيفة خلق النقود واستخدامها كأداة نقدية للتحكم في الاقتصاد )
سنة ١٩٤٤ اجتمعت ٤٤ دولة في بريتون وودز و تم تأسيس نظام دولي لتبادل الاموال و تم ربط الدولار بالذهب بقيمة ٣٥ دولار لأونصة الذهب و ان باقي العملات ترتبط بالدولار بنسبة تذبذب ١٪
طبعا ده اظهر تحول القوة العالمية من اوروبا الي امريكا واهمية الدولار بعد الحرب العالمية الثانية وتحوله من عملة محلية الي عملة الاحتياطيات الدولية .
وفضل العالم ماشي على النظام ده لحد اغسطس ١٩٧١
قام الرئيس الامريكي ريتشارد نيكسون اعلن ان اللي معاه دولار خلاص مش هيبدله بدهب
و ده اللي عندي و اللي مش عاجبه يخبط دماغه في الحيط
وكل عملة تسند نفسها وقيمتها تتحدد بالعرض و الطلب عليها
و اطلق على الكرسي في كلوب ده " صدمة نيكسون "
و دول كتير عملت كده بعد الحروب العالمية الاولى التانيه بسبب استنزاف الدهب في التسليح و غيره ..
ومن وقتها احتياطيات العالم و عملاتهم مرهونة بالدولار و اي حاجه تأثر عليه يتأثر بيها العالم زي ما شيفيين انهارده
و الضمان الحقيقي الوحيد لقوة اي عملة هو قوة اقتصادها ..
يتبع ..