فيها حاجة حلوة
بقلم : دكتور عمرو السمره
النهارده موبايلي ضاع ووقع مني و أنا نازل من العربية و الموبايل ده غالي جداً المهم كنت في إجتماع ونسيت خالص الموبايل بعدها بساعات كتير جيت اعمل مكالمة فجأه ملقتش التليفون اتصلت عليه رد عليا واحد قالي انا لقيته في الشارع
قولتله ده موبايلي
قالي حضرتك فين و انا اجيلك
قولتله لا انا اللي هجيلك
قالي انا ساكن في احمد ذكي المعادي
قولتله بس للاسف انا ممكن اتأخر
قالي هستنى حضرتك .
بصراحة و انا بتصل بيه تاني كنت متوقع إني الاقيه مقفول لكن ده ماحصلش و رد عليا قالي حضرتك فين .
قولتله انا في الطريق
قالي عارف كشري هند هستناك هناك
رحت و لقيته هو الراجل المحترم اللي في الصورة ده الراجل الغلبان الطيب ده
عزمت عليه بفلوس مارضيش ابدا والله ابدا رفض تماما بالحرف حاولت كتير قوي مارضيش .
قولتله طب مش محتاج اي خدمة اعملها ليك قالي كتر خيرك .
جيت ابوس على دماغه رفض و قالي العفو يا بيه .
قولتله اللي في أخلاقك هو اللي بيه انتَ راجل غني .
قالي انا على باب الله قولتله فيك غنى
ورضا مش موجودين عند حد كل اللي قدرت اعمله اديته رقمي .
الراجل ده شغال في مغسلة سيارات
بجد شرف ليا اني اتصورت مع الراجل ده اغلى صورة في حياتي .
دي صورة من الصور اللي المجتمع يفتخر
به ، الأمانة والأخلاق والرضا وعنوان للكرامة والعزة فعلا رجل يحبه الله .