الناس والظروف - عامية مصرية
بقلم : صلاح الحوتى
انا بشكر الظروف اللي قالت
اتفرج عالناس وشوف
وانا فالدنيا بلف وأطوف
اللي فكر فيا عارفه
واللي ناسينى تملي فاكره ومابقلوش
شفت صاحب العمر والسنين
اللي باعنى ونسي المعروف
غرته دنيته والعيش والملح انتهى وراح
وشفت واحد كان تملي مآنس وحدتي
وكان لي مَثل ومعلم واخ وصديق
واتغير مع السنين ومافيش سؤال
ولا كلمة تقرب بنا الوصال
وكل ماقرب مالقهوش
وانا بقلب في تليفوني
بشوف مين صاحي
لقيت المنافق والغشاش
والكذاب ومسّاحي الجوخ
واللي تملي يقول
انتا في بالي وحشني ياغالي
واللي فارق واللي سافر
واللي صعب يتعاشر
وكلمات وشعارات
والنفوس متغيرة زي الوشوش
راحت فين الصحبة الحلوة
هو الزمن اللي بيتغير
ولا قلوبنا اللي بتتغير
ولا العيشة بتغير النفوس
انا مليت من العيشة والصحبة
ونويت انسى الظروف
بين العشم وبين الغشم نقطة
تغير معنى الكلام وتسلم النقطة
اللي بينت لينا المعادن والصفات
انا بشكر الظروف اللي قالت
اتفرج عالناس وشوف .