كان يوم معانا
بقلم
الشاعر والأديب
عماد الدين محمد
طول ما أحنا عايشين
كل واحد بعيد عن التاني
فى سواقي الحياة دايرين
يمكن نفتكر بعض
في عيد أو مناسبة
ويمكن نفضل ناسيين
ماهي دنيا وخدانا
وفي لحظة الوداع
دموع كانت متحجرة
تنزل ما تعرف جاية منين
ما إحنا كنا مع بعض عايشين
يمكن نختلف
يمكن نبعد ونتخاصم
علشان وجهة نظر
والا مشاكل الحياة
ولا شويت ملاليم
وبعد الرحيل
دا كان عزيز وغالي
وكلامه حكم وحقاني
وندور على صورة
ونبكي على فراقه
دا راح فى غمضة عين
ويبقى كلامه زمان
حق ويقين
وياريتنا قلنا آمين
هايوحشكم
ما كان بينكم
وأنتم بيه مش حاسين
بيطلب الود
من قلوب تاهت من سنين
هي دى سنة الحياة
بس مين يتعظ مين
كأس وداير
وأحنا منه شاربين
نشبع من بعض
نسأل على بعض
مش لازم لما نموت
نحزن ونقول راح فين
ونعوض خسارتنا منين .