سنة جديدة
بقلم محمد ابو سيف
سنه جديدة هلا علينا
يا ترى هتكون سعيدة
والا هتبكي عنينا
أيامنا مليانة هموم
وبالمرار ياما انكوينا
غرقنا مع السنين
وم الحزن ياما باكينا
والصبر فلت عياره
من كتر ما اسينا
................
سنه وراحت بكل ما فيها
نسيتنا الدنيا والا احنا افترينا
عشنا مع نفسينا ونسينا
حتى أهالينا
سلمنا روحنا للطوفان
ومعدش في حد يقوينا
لا صحاب ولا احباب
والكل بيجرح فينا
ادينا كل شئ جميل
وبالغالي والله اشترينا
باعونا بأرخص ثمن
ومن الغدر ياما انكوينا
جراح كتير مليانة
ومفيش اللي يداوينا
............
سنه فاتت عليا ومش حاسس بيها
سنه مرت عليا مليانة دموع
اشكي لمين واحكي
وانا صوتي مش مسموع
ومين هيسمع يا قلبي
وانت من الكل موجوع
غرقان في بحر الاسى
غرقان في بحر الشوق
نفسي في حد يحس بيا
والا انتهى الموضوع
مشيت في سكة غلط
ومكانش فيها رجوع
نادم يا رب بفعلتي
نادم وانا اللي ليك مرفوع
أقبل يارب توبتي
يارب محمد ورب يسوع
.............