ابويا
بقلم / احمد نيازى
ابويا جالي في المنام
قالي اصحى ياواد يا احمد قوام
خبرني كيف حالك لسه بتضحك زي زمان
وواخد حياتك هزار وكلام
وبتصرف على الفاضي والمليان
خبرني لسة زعلان من أولادك والمدام
وعاملين معاك الصح واللا في الحزن غرقان
بس انا زعلان منك مفيش لي زيارة اوعى تقولي مشاغل الايام
بس انت ياخسارة شبت قبل الأوان
قلت يابا سبني اشتكيلك احكيلك الظلم والذل والهوان
خبرني يابا كيف حال امي قال عال العال
بتشرب من الحوض ولا حد فينا تعبان
يابا نفسي أجلكم قالي انت جاي بس لما يؤون الاوان
مالك كده مهموم زعلان فين ضحكتك والفرفشة في طلتك نستها ليه قوام
يابني مفيش حاجة تستاهل انت اللي بختك مايل من زمان
قبل مامشي هقولك نصيحة حطها حلقة في الودان
اللي باعك بيعه واللي اشتراك حافظ عليه وسلملي على اخواتك كمان
ان شاالله يكونوا تمام
انا همشي خلي بالك من نفسك وسلام
يابا ياريتني ما اصحى من المنام
