"اشحن بطاريتك "
كتبت : شيرين رأفت
ابني عنده سكوتر سافرنا ورجعنا لاقيناه مش شغال، باباه قال ان البطارية اتجمدت من قلة الشحن كان لازم تتشحن وتفضى وتتشحن وتفضى عشان تفضل عايشه، اقصد شغاله
ابني طبعا زعل قوي واستغرب لأنه كان سايبه شغال وكان بيحبه قوي .
جه في بالي العلاقة بين الاسكوتر والإنسان وافتكرت ابني اللي كل شوية ييجي يقولي : ماما ممكن تحضنيني ،
احنا بنحتاج الحضن عشان نشحن بطاريتنا اللي بتفضى من عوامل ومؤثرات الحياة،
الحضن عنصر نفسي مهم قوي مش بس لابني عشان هو طفل احنا كمان بنحتاج الحضن منهم قبل ما يحتاجوه مننا،
وبنحتاجه من كل حد قريب مننا وبنحبه، الحضن بيعمل اعادة شحن لبطاريتك، للأمان، للدفئ، بيرسل رسالة للمخ
"ان اطمن، انت بأمان" ..
لو أمك و أبوك عايشين احضنهم ليل ونهار اشحنهم واشحن نفسك دي طاقة متجددة اشبع منهم قبل فوات الأوان اوعى تقول كبرت .
اوعو تنسوا تحضنوا ولادكم كل يوم واكثر من مره بدون شروط ومن غير مناسبة صغيرهم وكبيرهم مفيش حد بيكبر على الاحتياج للحب.
لو فعلا بتدوروا تربوا ولادكم تربية إيجابية اسقوهم حب شبعوهم واحضنوهم بدون قيد بدون هدف بدون سبب .
بعض فوائد العناق :
١- تقوية الجهاز المناعي .
٢-الحماية من الضغط والشعور بالتوتر .
٣-تعزيز الثقة بالنفس والاطمئنان خاصة عند الأطفال
٤-يعمل على مساعدة الجسم في إفراز مادة الدوبامين المسؤولة عن السعادة عند الإنسان .
٥- يعتبر العناق مسكن طبيعي للالم، بسبب افراز الاوكسيتوسين.
٦-عناق الطفل يبعد عنه التوتر والقلق، كما انه يقلل من تعرضه للتعب والاجهاد، ويقلل من احتمالات الاصابة بامراض القلب.
٧-العناق يحمي الطفل من التعرض للهزات النفسية، كما انه يضمن له صحة نفسية سليمة.