"فضفضة مغترب"
كتبت : شيرين رأفت
"فضفضة مغترب"
كتبت : شيرين رأفت
متغربين آه متغربين
يا اللي انتوا شايفنا أونلاين فمطمنين
وقلتم أكيد بخير وأهم عايشين،
ابقوا اسألوا علينا يمكن لسؤالكم محتاجين.
ورا الشاشات
في كتير حاجات
مدارية،
في الف آه وآه،
وضحكات
مش حقيقية،
في قلق و دموع كثير،
وخوف ومشاعر حنين،
متغربين آه متغربين
مستنيين منكم مكالمة أو رسالة
تسألنا انتوا فين
عاملين إيه ؟
أخباركم إيه ؟
وحشتونا،
إمتى جايين؟
متغربين آه متغربين
محتاجين آه محتاجين
حد يسمع كلامنا أو حتى السكوت
جوانا كل يوم بيصرخ الف صوت
كل يوم بنخاف
بره البلاد
نموت
ومتعرفوش الا خبرنا.
ساعتها بس هياخدكم الحنين
وتحسوا بندم السنين
وتقولوا ياااااه معقول
دول كانوا تعبانين ومخبيين
ما هو لو سألتونا
كنا جاوبنا.
