اقرأ التفاصيل
recent
أخبار عاجلة

ازرع الخير تحصده غدا

 ازرع الخير تحصده غدا

كتب - جيلان محمد 

القاهرة

ازرع الخير تحصده غدا


إوعى تكون فاكر إن فيه حاجة بتضيع عند ربنا


القصة واقعية


المهندس وليد منير من الإسكندرية

فى سنة ٢٠٠٢ ، كنت بدرس بكلية الهندسة جامعة الإسكندرية ..

وكان ليا اصحاب من مختلف طبقات المجتمع . وكانت ظروفي على قدها جدا ،  لان والدي موظف بسيط ووالدتي ست بيت  .

المهم جماعة من زمايلى اللى ظروفهم كويسة ، حبوا يعملوا فيا مقلب..  وطبعا مقلب موجع اوى..

قالوا لى تعال بعد الكلية نتمشى شوية ، ونشرب حاجة فى اى كافتريا برا... 

المهم خرجت معاهم وكانوا مجموعة شباب وبنات عددهم ١٠. وفي العادة ، كان كل واحد بيحاسب لنفسه . 

المرة دى، 

بعد ماكل واحد شرب المشروب بتاعه،  بدأوا يتحججوا،  وكل واحد يخرج من الكافيه ويختفي ويبصوا لبعض ويبتسموا .. وانا مش فاهم حاجة . 

لحد مابقيت لوحدي ، وماكانش معايا موبايل عشان اتصل بحد. 

وبعد ساعه كاملة ،

فهمت انهم كانوا قاصدين كدا. بس انا ماشكّتش فيهم...  ومش عارف كان دا غباء مني ولا طيبة زايدة.

المهم   قمت عشان امشي فبسأل الكاشير ، كم الحساب؟ قاللى ٢٥٠ جنيه !!  وكل اللى معايا كان ٣٥ جنيه ... فاتصدمت..

قلتله، 

طيب ممكن صاحب المكان ؛ فقاللى اوك .

 جالي راجل كبير فى الخمسينات..  وقاللي خير ...

قلتله حصل كذا وكذا وحكيتله الموقف...

وقلتله بكرة حاجيبلك المبلغ ..

وخلي كارنيه الكلية وبطاقتي الشخصية معاك ضمان لحقك .. 

فضحك وقاللي، 

عيب يابني خللي كارنيهك وبطاقتك معاك.. وتعال بكرة او بعده،  او وقت مايكون معاك وادفعهم. 

ولو مجتش خالص مسامحك..

انا عينيا دمعت من الموقف .. 

ومشيت وجيتله تاني يوم،  اديتله 250 جنيه اللي كنت محوشهم ..

واخدهم بالحاح شديد مني.

 بعد سنة خلّصت كليّتي ،

وسافرت المانيا وربنا اداني من فضله الحمد لله .

 وبعد ١٠ سنين كنت خلصت الماجستير والدكتوراه..  واشتغلت فى شركة متوسطة هنا فى ميونخ .. 

ورجعت مصر في اجازتي العادية ..


وسبحان من خلاني امشي لحد الكافيه دا في اليوم دا ..

قلت اروح اسلم عالراجل دا ..

ولقيت الكافيه مقفول . سألت على عنوانه ،

خفت لا يكون مات كنت هازعل جدا ..

رحت له البيت لقيته هناك وفتحلي الباب بنفسه .. وقاللي مين حضرتك يابني؟؟ 

فذكرته بنفسي،  وافتكرني بعد معاناة .. 

قلتله انا جاي ازورك واطمن عليك ..

واسألك ليه قافل الكافيه بتاعك ؟؟

قاللي ، 

يابني انا الديون زادت عليا من الضرايب والفواتير والمصاريف .. وماكنتش قادر ادفع مرتبات العمال لأن الكافيه مابقاش يكسب زي الاول ..

قلتله انت عليك كام وترجع تفتحه تاني ؟؟ 

قاللي مبلغ كبير يابني.. 

وبعد اصرار مني قاللي عليا حوالى 120 ألف جنيه .

قلتله طيب ممكن بكرة  اتغدا عندك ؟؟ 

قاللي يابني اهلا بيك وتنور .. 

تاني يوم العصر جيت له ،

وكان مجهز غدا حلو اوي. واتغديت معاه ..  وبعد كدا اديتله اكتر من المبلغ اللي قال عليه .. قاللي دا ليه يابني؟   قلتله انا خلال اسبوع بالكتير عايز آجي اشرب قهوة في الكافيه،  ممكن ؟؟ 

كان رفضه شديد .. 

وهو مش مصدق الموقف اساسا وبيترعش .. 

وانا اصراي كان اشد ..

فلما لقى مفيش فايدة، 

قال لي تعرف يابني ، 

انا امبارح صليت لربنا وطلبت منه وانا ببكي ومش مصدق ان ربنا استجاب بالسرعة دي..


لقيته فضل يبكي لحد ماقلبي وجعني . قلتله ها طيب  آجي الكافيه بعد اسبوع اشرب قهوة ؟؟ ممكن ؟؟  ولا اجيب  ماكنة القهوة معايا وانا ببتسم ؟؟

فابتسم وقاللي، 

ثوانى طيب هعملك ورقة  بالمبلغ دا عشان اسددهولك لما ربنا يكرمني .. 

قلتله فاكر انت قلتلي ايه لما قلتلك هاسيبلك البطاقة ؟؟  قلتلي تعال وقت مايكون معاك،  ولو ماجتش مسامحك.. 

وانا برضوا هاقولك مش هاخد ورق .. وبرضوا مسامحك جدا..

فحضني حضن جامد اوي وهو بيبكي.

 وقلتله هاستاذنك دلوقتي وبعد اسبوع هاجي الكافيه وانا ببتسم..


عمر ربنا ما بينسى اللي بيعمل اعمال رحمة. 

وخصوصا مع الناس اللي فى ظروف صعبة وكله بتدابير الله .. 


 سبحان من خلاني انزل اجازة في الوقت دا تحديدا..  وسبحان من خلاه ييجي على بالي .. 

وسبحان من خلاني اروحله الكافيه ..

وسبحان من سخر ليا راجل غريب في الشارع يعرف عنوان بيته ويوصلني ليه..


 خيرا تعمل اجرا تلقى .. 

قد ينسى الناس ما فعلته ولكن الله لا ينسى


ارجو أن نكون قد استفدنا جميعا و علمنا أن الجزاء من جنس العمل و حقا اعمل يا بن آدم فكما تدين تدان و ازرع الخير تحصده غدا و ازرع الفرح تفرح و ازرع الحب و انثره تجده و لو بعد حين .

ازرع الخير تحصده غدا


google-playkhamsatmostaqltradent