التسويق الشخصي
بقلم : د . ضياء الرفاعي
لايف كوتشينج
التسويق الشخصي طوق النجاة في زمن الزحام
انت منك كتير
واحنا في زمن بقى فيه العشرة بقرش من أصحاب المهارات والخبرات
بقى فيه ناس كتير جدًا بتشتغل وبتقدم خدمات وبتحاول تثبت نفسها
لكن الحقيقة الواضحة ، مش كل اللي بيشتغل بيتشاف
في وسط هذا الزحام
اللي ظاهر هو اللي بيكسب
واللي مستخبي بيتنسي بسرعة حتى لو كان عبقري.
التسويق الشخصي مش استعراض
في ناس فاكرة إن التسويق يعني استعراض أو غرور
أو إنك تقول أنا مفيش حد قدي ، أنا الأفضل
وده مفهوم غلط
التسويق الحقيقي ببساطة هو
إنك تقول للناس
ده شغلي
دي النتائج اللي وصلت لها
دي المشكلة اللي قابلتني
ودي الطريقة اللي حليتها بيها
بوضوح وببساطة ومن غير مبالغة
ليه في ناس كتير بتخاف تسوق لنفسها؟
الإجابة بسيطة جدا الخوف
خايف من الإحراج
خايف من الظهور
خايف شكله يطلع مش كويس
خايف من كلام الناس
خايف من النقد
وفي الآخر…
بيختار إنه يسكت
انتظار المعجزة ده وهم
الناس دي بتعمل إيه؟
بتستنى فرصة
أو صدفة…
أو حد يكتشفها فجأة
لكن الحقيقة المؤلمة،
إحنا في زمن انتهت فيه المعجزات
والنتيجة
يزعل إنه محدش بيسأل عليه
أو بيطلبه
وهو أصلًا محدش شايفه
الشغل النضيف لوحده مش كفاية
واحدة من أكبر الأخطاء
إنك تفتكر إن شغلك الكويس كفاية لوحده
للأسف ، ده مش حقيقي
في وسط المنافسة الشديدة الموجودة حاليا
اللي بيكسب هو
اللي بيشتغل كويس
وبيعرف يعرّف الناس بشغله
أما اللي مستخبي
بيتنسى ،حتى لو كان ،عنتر زمانه
قيمتك في السوق
مش ثابتة
لو إنت خريج جديد، لازم تبقى فاهم
قيمتك في السوق = صفر ، مبدئيًا
مش تقليل منك
لكن لأنك لسه مفيش خبره وما أثبتش نفسك
القيمة بتيجي من 3 حاجات:
تتعلم
تتدرب
وتسوق لنفسك
وقتها بس…
قيمتك ترتفع
ودخلك يزيد
التسويق الشخصي = بقاء
التسويق لنفسك مش رفاهية،
ده طوق نجاة
هو اللي يمنع السوق يدفنك وانت عايش
هو اللي يخليك موجود وسط المنافسين
هو اللي يخلي الناس تعرفك وتطلبك
الخلاصة
لو ما عرّفتش الناس إنك موجود…
السوق هيتعامل كأنك مش موجود
فابدأ من دلوقتي
اعرض شغلك
اتكلم عن خبرتك
شارك نتائجك
واشتغل على اسمك
مش لازم تبقى الأشطر
لكن لازم تبقى الأوضح
إما إنك تختار تظهر ، أو تختار تختفي
ومحدش في السوق بيدوّر على حد مش باين.