المشهد الحالي بين إيران وإسرائيل وأمريكا
كتبت: شيماء داوود
المشهد الحالي بين إيران وإسرائيل وأمريكا يشبه
( جروب واتساب ) بتاع العائلة
الكل فيه بيشتم في الكل
بس مفيش حد عايز يخرج من الجروب
أو يواجه التاني في الحقيقة
إسرائيل حالياً بتلعب دور الشخص اللي بيخبط على باب الجار ويجري
ولما الجار يفتح
بتستخبى ورا ( أخوها الكبير أمريكا ) هي بتضرب أهداف في العمق
وبتقول للعالم ( أنا بدافع عن نفسي )
وفي نفس الوقت بتبص لأمريكا وتقولها ( شوفي بيعملوا فيا إيه )
إيران عندها أطول ( تريلر ) فيلم في التاريخ
الرد الإيراني دائماً موصوف بأنه
( قاسي و مرعب و مخيف ) لكنه غالباً بييجي بتوقيت ( جرينتش ) وبعد ما يكونوا بعتوا إيميل للجميع بموعد ومكان الضربة الموضوع قلب ( تمثيلية صامتة )
إسرائيل تضرب إيران ترد في الصحراء والكل يروح ينام وهو حاسس بالانتصار
أمريكا حالياً بتلعب دور الحكم اللي مراهن على الفريقين
في العلن
( نطالب بضبط النفس ووقف التصعيد )
و تحت الترابيزه بتبعت شحنات سلاح لإسرائيل عشان ( تظبط نفسها )أكتر
و لا كأنهم ماسكين خرطوم ميه بيحاولوا يطفوا حريقة هما اللي بيبيعوا الكبريت بتاعها
الخلاصه
إسرائيل تضرب "قلم"
إيران تحلف بالطلاق إنها هترد "بونية"
أمريكاتمسك إيران من إيدها وتقول لها "عيب" وتمسك إسرائيل من إيدها وتديها "خاتم دهب"
و النتيجة
مئات الصواريخ بتطير في الجو
ملايين التغريدات على إكس (تويتر سابقاً)
وفي الآخر مفيش حد عايز الحرب الشاملة لأن الكل عارف إن ( البيت كله من ازاز ) .