إصحى يا نايم
بقلم - منى منصور السيد
إصحى يا غافل وحِّد الرزّاق
إصحى يا ناسي العمر سرّاق
وصحِّي قلبك المخطوف
قبل الوجع ما يحلّ بالأشواق
يا شاب يا وردة بستاننا ليه تذبل؟
وليه في سِكّة الضلمة تروح تقبل؟
بِعت الصحة ليه؟
وبِعت الغالي ليه؟
ده السُّم في "الحقنة" وفي "الحبّة" بيقتل!
يا مسحراتي بادي الندا بحرقة
على الشاب اللي غايب وفي عيونه سرقة
سرقة شباب وعمر وضياع أمل أهل
والأم في الركن بدموعها غرقانة في فرقة
يا ساند ضهرك على وهم ورماد
فوق من سراب "الكيميا" ده سُمّ البلاد
يا ابني الحكاية سودة وآخرتها الندم
والجسم ينحلّ والروح تصيح بجهاد
إصحى يا ابني رمضان كريم وعظيم
ارجع لربك واسلك صراطًا مستقيمًا
إرمي "الصِّنف" من يدك وعمّر كيانك
بدل ما تندم في وقت مالهوش غريم
إصحى يا نايم وحِّد الدايم
ورمضان كريم.