عودة إمام عاشور لقائمة الأهلي تربك حسابات النادي الجزائري
محمد أبو سيف
بعد عودة إمام عاشور في قائمة الأهلي أمام شبيبة القبائل لأول مرة من يوم 14 سبتمبر يعني من حوالي 68 يوم تقريبًا، لكن في الواقع فعليًا هو غايب من وقت إصابته أمام إنتر ميامي يوم 15 يونيو يعني من "159 يوم".
إمام عاشور أعتقد مش هيكون لعيب أساسي أو مؤثر في الماتشين بتوع شبيبة القبائل أو الجيش الملكي المغربي لكنه هياخد دقايق محدودة وكمان حسب سير الماتشات دي والأريحية اللي الفريق هيكون فيها لأنه غايب فعليًا بقاله أكتر من 5 شهور عن ممارسة الكورة.
لكن الحقيقة بنظرة أكبر، فهو عودته فنيًا للفريق بعد التوقف إن شاء الله إضافة فنية ضخمة للمدرب الدنماركي ييس توروب مع أسلوب لعبه، خصوصًا إنه بيستخدم اللعيب رقم 10 بيكون Roaming بيتحرك يمين وشمال عشان يعمل linkup مع طرفين الملعب.
كمان في الضغط فالفريق بيتحول لـ4/4/2 وبيكون اللعيب رقم 10 بيكون مهاجم تاني.
لما نيجي نبص لكل دا هنلاقي إمام عاشور حرفيًا هو اللعيب الـperfect لكل دا، اللعيب اللي يحب جدًا يكون roaming ويتحرك يمين وشمال، ويستهدف أنصاف المساحات في دفاع الخصم أو يتحول لمهاجم تاني في وقت من الأوقات، هيعملها بشكل أفضل كتير من زيزو أو تريزيجيه لأنهم بيعملوها بنسبة إتقان معينة لكن قوتهم على الطرف أكتر من العمق.
وجود إمام عاشور لما يرجع fit هيكون مثالي في الدور دا وهيديك 100% فيه، وكمان هترجع لعيب زي زيزو وتريزيجيه للطرف في مراكزهم الأصلية وتاخد منهم هم كمان الـ100% برضو، وكمان هيوفرلك خيارات على الدكة بدل ما تبقى فاضية بوجود واحد من زيزو وبن شرقي وتريزيجيه على الدكة مثلا كخيار هجومي، وجود واحد من بن رمضان أو ديانج كخيارات للوسط فدا بيديك عمق كويس.
الحقيقة إن إمام عاشور أهم لاعب لأنه بينطبق عليه أسلوب لعب ييس توروب ، والنقطة الأهم هو إن إمام عاشور يبقى حاطط في باله دايمًا إنه مش محتاج يثبت حاجة لحد، هو لعيب جامد جدًا والكل عارف إمكانياته اللعب الجماعي هو الطريق اللي هيطلع أفضل ما في المجموعة ككل ودا لإمام ولباقي النجوم ودي المعادلة الصعبة، الأفراد لخدمة الفريق.