بين التوثيق والفضيحة ... خطوة اسمها السوشيال ميديا
صفاء مصطفى
النيابة العامة في بيان لها أكدت إن تصوير الجرائم أو الوقائع مش حاجة وحشة في حد ذاتها بالعكس ده ممكن يبقى دليل مهم يساعد العدالة لكن الشرط الأساسي إن المواطن يبعته للجهات المختصة من غير ما ينشره على السوشيال ميديا لأن بمجرد ما الفيديو ينزل أونلاين بيتحول من توثيق لفضيحة وبدل ما يخدم العدالة بيأذي المجتمع كله.
النيابة كمان شددت إن التعاون بين المواطن والجهات المسؤولة هو الطريق الصح يعني دورنا كمجتمع مش إننا نعمل تريندات لكن إننا نوصل المعلومة للي يقدر يتصرف ويجيب الحق.
ولازم ناخد بالنا إن الفيديو اللي بيتنشر مش بس بيأثر على الشخص اللي فيه لكن كمان بيأثر على صورة بلد كاملة قدام العالم. اللي بيتشاف هنا ضحكة أو لقطة برا بيتشاف إنه عنوان عننا وعن قيمنا.
والموضوع مش بس في الجرائم ده حتى في الأفراح والانتخابات وأي مناسبة عامة أول ما حد يرقص أو يعمل حركة مختلفة الفيديو يتشال ويتنشر ويبقى تريند وهنا بيضيع المعنى الحقيقي للمناسبة وتتحول للفرجة والسخرية.
اللي لازم نفهمه إن مش كل حاجة تتصور لازم تتنشر ومش كل لقطة تتعمل شير التوثيق مسئولية كبيرة والفضيحة بتشوه سمعة وبتكسر الخصوصية والكرامة والكرامة دي مش بس تخص الشخص اللي في الفيديو لكن بتخص مجتمع كامل.
الخلاصة: موبايلك ممكن يبقى أداة خير ومساعدة لو استخدمته صح وممكن يبقى أداة أذى وفضيحة لو استعملته غلط. فكر قبل ما تضغط زرار "نشر" واسأل نفسك: أنا كده بساعد ولا بأذي؟