سنين مرت على فلسطين
قصيدة للشاعرة د . ألفت معتمد
كتب - د . عبد الرحيم ريحان
أهدتنا الشاعرة الدكتور ألفت معتمد عبد الحميد قصيدة هامة بعنوان "سنين مرت على فلسطين"
الشاعرة فى سطور
د . ألفت معتمد عبد الحميد سالم
أستاذ مساعد بجامعة حلوان
لها ديوان سابق بعنوان "عزوتى وسندى"
نشر فى 2021
مدرب معتمد بمركز تنمية القدرات بجامعة حلوان
قامت بنشر 20 بحث بالدوريات العلمية ولها مشاركات مجتمعية فى نشر دراسات علمية بشكل مبسط في مواقع الإنترنت والصحف المصرية والعربية
ألقت عددًا من المحاضرات للتوعية العلمية بقصور الثقافة والصالونات الثقافية.
قصيدة : سنين مرت على فلسطين
للشاعرة الدكتورة ألفت معتمد عبد الحميد
سنين مرت حصل فيها على فلسطين الغالية
ميت عدوان
وتكراره من المحتل وصمت الناس
في كل مكان وكل زمان
خلق منهم وحوش ضارية
ماتفهمش أن فيه انسان
له حق بارضه يتمسك عشانها يموت
لا يوم فرط ولا يوم خان.
وفى المرة دى زاد العنف والقسوة وفى غزة
بيوت تنهار وضرب النار صوته يرن في وداني
أنا المرة دي لا هشجب ولا استنكر
وردة فعلي شىء ثاني
عن اللي في داخلي راح اعبر
بإحساسى ووجداني
أخويا بينضرب بالنار
ومن سطوة عدو غاشم
بيقاسي وبيعاني
وقلبي عليه بيتقطع
ومش لاقية كلام كافي
لو أقوله على لساني
لأن مفيش كلام ممكن
يترجم كل أحزاني .
اذا الواحد في لحظة قال
كلام عكس اللي قاله زمان
يقولوا عليه ده له وشين
ويتلام الف مرة كمان
فما بالك إذا كانت دول كاملة
مبادئها بتتغير في وقت ما يلزم التغيير
بتحكمها مصالحها وكيف هتصير
يشوفوا الشئ وعكسه صحيح
وبيعيشوا على ازدواجية المعايير.
أنا عقلي خلاص هيشت
بأى ميزان يا دول الغرب بتقيسوا
تشوفوا القتل من محتل دفاع مشروع
في حين اللى خذوا أرضه وقتلوا ضناه
وبيدافع وبيقاتل
يكون فى نظركم الجاني
نسيتوا إن الإله موجود
وإن السطوة والجبروت ده شىء فاني
عيون الغرب شايفة القتل
شايفة الظلم .. وبتعاند
في صف الظالم المحتل
تقف دايمًا بتأيد وبتساند
دول طول السنين بتقول عن الحرية احلى كلام
وكنا بنفتكرها رموز بتتمنى امان وسلام
لكل الناس بدون تمييز لكن طلع الكلام أوهام
حقوق انسان ده للغربي وللعربى العيوب تتعد
خلاص لعبتكم انكشفت ومولد إنسانيتكم كمان انفض
ودم أولادنا في إيديكم
وقسوتكم لكل مكان اهه بتتمد
ولسة كلامكو في ودّانا
كلام وصّل لحيطة سد
لا عاد ينفع نعيش ثانى كما كنا
ولا ينفع نصدق حد.
كانت غيمة على عيونّا
خلاص فقنا .. وغلطتنا
ما راح يوم ثاني تتكرر
فلسطين الأبية خلاص
من سطوتكوا ونفوذكوا هتتحرر
وكل بضاعة تبيعوها في اراضينا
ومكسبها يروح للغرب .. هتتقاطع
ونفق العتمة والظلمة هيتبدل
بنور ساطع
كفاية سنين ندوق المر
قصاده تلموا في مكاسب
ده مهما الظلم شافله ايام
هيجى يوم
يكون العدل فيه غالب
وكل اللى ظلم إنسان
وجار على حقه وحياته
هيجى يوم ويتحاسب .