الخذلان
كتبت - فرح الشعراوي
كتير مننا أتعرض لصدمات في حياته من الاهل والاصحاب حتى الناس اللي حواليك و ده لانك حطيت فيهم ثقة و رفعت سقف توقعاتك و في الاخر اتخذلت ، ايوة اتخذلت و ده معناه انك احبطت و هتخش في حالة اكتئاب ، و انعزال ، وتكره وشوش البشر و بالتالي هتنعزل حبه حلوين كدة ..هتبتدي فيهم تفلتر وشوش حواليك وهيتبقالك وشوش بسيطة ،اللي وقفو جنبك ..هتبتدي تتجه لحاجات جديدة تتعلم حاجات كتيرة ، وهتتعلم ازاي تتعامل مع مواقف صعبة وازاي تعديها، ازاي تعرف الشخص من اول قعدة ، ف ده هيجنبك انك تقع في نفس الموقف تاني .
هتتعلم ترتب وقتك حسب اولوياتك ، هتعيش بإسلوبك الطبيعي و حياتك الطبيعية ، هتكشف ناس كتير على حقيقتهم و انت ساكت بنظرة واحدة ، هتقلل كلامك و هتسمع اكتر ،و تفلتر كل حرف خارج و داخل منك ، هتحس ان العتاب مالوش لازمة مع فئة معينة من البشر .
الخذلان بطبعه بيحولك من شخص لشخص تاني خالص، بس محدش بيتعلم حاجة في الحياة من غير ما يدفع التمن .
قبل ما انهي موضوعي عزيزي القارئ احب اقولك انك قوي و تقدر تعدي مليون عقبة في حياتك ولازم تعرف انك بطل قصتك .
{ وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ(97) فَسَبِّحْ بِحَمْدِ رَبِّكَ وَكُن مِّنَ السَّاجِدِينَ(98) وَاعْبُدْ رَبَّكَ حَتَّى يَأْتِيَكَ الْيَقِينُ(99) }
دايما افتكر الاية دي .