جنحة الضرب في القانون المصري

 بالعامية أكتب ( ربوا عيالكم ) 

بقلم : شيرين رأفت 

(البنزين غلي والاسعار بتعلى ومش هنلحق نعمل حاجه للعيال ...الخ الخ الخ ) .

ودخلنا في الدايرة المظلمة اللي ملهاش اخر فضلنا نجري ونجري ونجري ونسينا حاجه مهمه جدا ..نربي ونركز مع عيالنا شوية ( معذورين وضغوط الحياة هنأكلهم منين ). ممكن تكونوا معذورين حقيقي، بس مش بسبب الغلاء، ده بسبب قلة الايمان والإدراك والتصديق بإن "من توكل على الله فهو حسبه" .. وإن الرزاق هو الله وان السعي ماهو الا اخذ بالأسباب لكنه مش السبب لحصول الرزق. 

( يعني نقعد في البيت ونحط ايدينا على خدنا ونستنى الرزق) لا طبعا ! محدش قال كده، بس نعقلها ونتوكل بمعني متجريش اكتر من اللازم متجهدش عقلك وفكرك اكتر من اللازم .

وبسبب كده اهملنا اولادنا ، وللأسف اهملناهم عشانهم.

 الام اللي نزلت تشتغل دوام كامل طول اليوم عشان ترفع مستوى المعيشة والعيال تدخل مدارس وجامعات خاصة ودولية،

ده خطأ كبير انا مش ضد عمل المرأة بس انا قلبا وقالبا ضد عمل الأم اللي يأثر على دورها ووظيفتها  الأساسية وهي (الأم ). 

عارفين يعني ايه ام ؟!

 يعني ( اشباع حب وحنان ودفا وحضن يعني ابتسامة تمتص الخوف والقلق ، يعني تربية، تعليم، تهذيب، نصح، وارشاد، يعني متابعة وملاحظة وتوعية ماما موجوده يعني اكل صحي مفيد يفيد البدن والعقل، مش بس كده  ماما يعني حاجات كتير ......ودور ووظيفة كبيرة قوي صدقوني أي خلل فيها بيأثر جدا على الطفل فيما بعد.

 ومفيش أعذار للتقصير،  الأم عايزة تشتغل وتساعد يبقى تشتغل شغل يتناسب ولا يتعارض مع وظيفتها الأساسية الرسمية مفيش كده يبقى الأفضل هو الاكتفاء بوظيفة الام ونترك السعي للأب ومش لازم نعلى متطلباتنا نخفها شوية مش لازم مدارس دولية وجامعات خاصة مش هي دي اللي هتخلي اولادك احسن الناس،

 متفكروش في الناس ونظرتهم، وركزوا مع ولادكم وابنوا فيهم مش ليهم، حفظوهم القرآن وعلموهم دينهم من اول ما يبدأوا يفهموكم عرفوهم الصح والغلط والحرام والحلال وتابعوهم وراقبوهم.

 حافظوا عليهم من نفسهم وادعوا ربنا يربيهم معاكم بلاش تجروا بيهم على الدنيا ومن كتر الجري يتوهوا منكم في وسط الطريق وفي الأخر ترجعوا من غيرهم .