أجيبلك منين يافن
عامية مصرية بقلم : صلاح الحوتى
اصرف منين على الثقافة والأدب والفن
وانا حيالله انسان بسيط حياتة ورقة وقلم
ويمر عام ورا عام والدنيا كانت مدرس المادة
يراجع ويصحح وياويلي لوغشيت كلمة
الاقي عصايته تلسعني وتملي اتعلم وافضل فاكر
لفيت بلاد الله وشقيت وعرفت معنى الحال
كانت حياتي مغلقة بعمل حساب لبكرة والايام
كنت تملي مصاحب نفسي واخاف عليها من الناس
واجيب القرش جمب اخوه واصبر عليهم يكونوا جنيه
واتسلى بقرطاس لب وانسى طعم الزاد الحلو
واللي اشترى اللحم وطبخ ونسيني بطعم الجود
هو انا مش برده الساكن المجدع وليا عليكم حق الجار
الفن كان حلم السنين واتمنيت لقاه في الحال
وهدف جوايا كان يظهرلي في المنام وانا صابر
وعدت اعوام ومرت فيها السنين ومافيش لقي
مانعوني افن وقالولي ماتفنش دا الفن مالوش مكان عندنا
وانا اقول مايهمش وامانة عليك يافن ماتسبنيش مافهمتش
تعبونى بكلامهم ونظرات عنيهم ومعانى زي السم
وتملي انساهم وارمي ورا ضهري وانسى اللي اتقال
كل واحد مننا له خصوصية وبناء درامي للشخصية
الدنيا حدوته مسرحية جوه حياتنا الواقعية
كل يوم الف حكاية وافعال واحوال
فيها انسان يحر وفيها انسان يغير
فيها العبر وفيها الغبر وفيها الوان واشكال
وناس رايحين وناس جايين كله بيبكي على ليلاه
واحد غاوي وواحد ناوي وواحد بيفكر
ونديت على الفن والندا كان صوته عالي
ووصلت له وكلامه عني فرحني وذكرني
ووصفنى بالفنان صاحب الموهبة الشقيان
كتبتك يافن معاني وانا ماحلتيش الا اللسان
واصرف عليك من كدي واحافظ على البنيان
أسست نفسي بنفسي وطلبت ليها مكان
أكون او لا أكون موهوب ولا انا موهوم
وكتبت مقال وقصة وحكيت حكايتي
وحصدت منها جوايز ليها قيمة ليها معنى
وبرافو ده كلمة كبيرة تحير سمعتها فالحال
معناها الواصل جوايا اني نجحت
ياخسارة ياكلام لو بتتاقل بالمال لاكون من الاعيان
واشتري عربية واعمل زريبة وبيت كبير يساعنى
واعيش مرتاح البال مانا اصلي جيت دنيتى
عاشق انا هيمان
لفيت بلاد الله وشقيت وعرفت معنى الحال .