إياكِ تقولي إني نسيتك
بقلم
الشاعر والأديب / عماد الدين محمد
إياكِ تقولي إني نسيتك
وبعد غيابكِ سنين
راجعة تعاتبيني تتهميني
غيرت مفتاح بيتكِ
غيرت عتبة داري
ما أنتِ اللي هجرتيها
إياكِ فاكره حبي ليكِ
زى حب شباب اليومين دول
لايكِ وكومنت وكلام وشير
والنهاية حظر وبلاغ وتشهير
أنا لما أقول حبيتك
أبقي حبيت صح
وحبكِ ملك كياني
وعقلي سارح فى ملكوتك
إتعلمي الحب قبل ماتظلميني
وأنا اللي كنت فاكرك فهمتيني
كمان بتتهميني
مكانكِ خدته غيركِ
غيرت رقم تليفوني
أكيد نستيه
زي ما نستيني
أقولكِ
يمكن تفهميني
أنا زى ما أنا من يوم ما سبتيني
لا غيرت عنواني ولا تليفوني
عارفة إيه اللي إتغير
شعري اللي شاب
وأنا فى إنتظارك
عقلي اللي شارد
من غيابكِ وهجركِ لداركِ
وصوركِ اللي إتهالكت
من كتر أحضاني
عرفتِ إيه إتغير
وإنتِ السبب مش الزمان
أقول كمان
ما أنا كنت ساكت وصابر
لما لقيت رسالتكِ وإتهامك
دفعت عن حبي
كان لازم أفكركِ
أنتِ اللي هجرت داركِ
عرفتي إيه إتغير
ولا أقول كمان
أقولك كفاية
وأختم بالسلام
سلام .