عِز نفسك تلاقيها
بقلم: محمد عبدالعظيم حماد
لحد إمتى هانفضل عايشين حياتنا نراضي اللي حوالينا سواء قريب أو غريب وبنحاول نحافظ عليهم وعلى محبتهم وقربهم،
في حين إنهم متجاهلينا تماماً ومفيش أي تقدير منهم للي بنعمله علشانهم .
المشكلة إن علاقتهم بينا علاقة مصلحة، ولما بتخلص بيرمونا،
يبقى ليه كمية التنازلات دي
إنتوا عارفين إن التنازل الكتير في غير موضعه بيِدّي إيحاء للي بتتعاملوا معاهم إنكم مبسوطين بكده وماعندكمش مشكلة
وإنهم شايفين إن هوا ده اللي إنتوا تستحقوه حتى لو بتتألموا ورافضين ده من جواكم .
صدقوني العلاقات ماتخلقتش إلا عشان تريحكم،
فلو مش هاتلاقوا ده يبقى قلتها أحسن، وماتسمحوش لحد يعاملكم بمشاعر مؤقتة
يقربوا لما يحتاجوكم ويبعدوا لما إنتوا تحتاجوهم
دى كده علاقة إنتوا بتحاربوا فيها لوحدكم، علاقة مابتجبرش الخاطر ولا تفرح ولا تسند، يبقى ليه تتمسكوا بعلاقة تخوفكم
خدوا بالكم إنتوا معتقدين إنكم بتضحوا عشان اللي بتحبوهم وإنهم مايقصدوش يقللوا منكوا لكن هما بالفعل بيبدأوا يشوفوكوا أقل منهم ،، وانتوا السبب
فتأكدوا إن التضحيات الزايدة عن الحد بتتحول تلقائيا لإذن منكم للي حواليكم إنهم يدوسوا عليكوا، ويبدأ كل الاستثنائي منكوا يتحول لحاجات عادية
ومع مرور الوقت هايبدأوا يشوفوكوا بكل تضحياتكم دي مش كفاية
حقيقي مش كل الناس تستاهل إنك تيجي على نفسك عشانهم وتعاملهم بطيبة
عز نفسك تلاقيها
ولو فرضنا إن الكل هايئذيك بطريقة ما
فـ إنت مش مطلوب منك غير إنك تلاقي الشخص اللي يستحق إنك تعاني علشانه .
ماتزعلوش على قلوبكم الطيبة الصافية اللي بتحب بجد و تخلص بجد،
ماتزعلوش على لين قلوبكم ،، دي نعمة كبيرة أوي من عند ربنا بس ماتضيعوهاش مع الناس الغلط ولا على الناس اللي ماتستاهلش ..
ووفروا طاقة حبكم لناس تستاهل إنكم تعملوا كل ده عشانها، ناس تستاهل لين قلوبكم وحبكم وعشقكم ..