يا أمي ماتزعليش
بقلم الشاعر والأديب
عماد الدين محمد
يا أمي
جاي أقولكِ
ما تزعليش
مش كل بطن
زي التانية
أصل أنتِ ولاده
خلفتي الشعراوى وطه وإحسان
خلفتي الحكيم ومحفوظ
وزويل كمان
وكتير من ولادكِ
صنعوا المعجزات
ماتزعليش يا أمي
عادي لما تنبت فى أرضكِ
نبتة شيطاني
ويظهر ويلمع
على أرضكِ
رقاص وحرامي
بلطجية فى تمثيلية
والا وحده ما تنكسف
ولجسدها معرية
والا كلامهم الهابط
قال إيه مهرجانات وأغانى
ماتزعليش يا أمي
روتينا من نيلكِ
منا اللي طمر فيه
وإلا نكر جميلكِ
فيه اللي حامي حدودكِ
شايل الكفن لاجل وجودكِ
فيه السهران على أمنكِ
وفيه اللي بيمص في دمكِ
ما تزعليش يا أمي
انا معاكِ وتحت أمركِ
أنا وكل إبن بار
حالفين نصونكِ
إوعاكِ يكون الهم نساكِ
يوم العبور
والا أرضكِ
اللي إتزينت بالزهور
وحمامكِ اللي بيرفرف
فى سما الكون
ما تزعليش يا أمي
طول ما هلالكِ
حاضن صليبكِ
وايد بتبني
وايد بتحمي
يبقى لازم تعود فصولكِ
ربيع شبابكِ
ترجعى متزينة
زي العروسة الزين
ماتزعليش يا أمي
بتقولي ايه
مش سامعكِ
مسامحهم
بعد اللي عملوه فيكِ
حضنهم !!
أقول أيه ... أم
وقلبكِ حنين
وحضنكِ يساع الكل
تعرفى
والله بحبكِ
إسمكِ على صدري
وسام
ولون رمالكِ
أخضر بستان
يا مصر يا محروسة
عاشقكِ كتاب وبيان
وأنا من حبكِ
كتبتكِ للسلام عنوان .
