زمان
بقلم - محمد عبدالعظيم
زمان كان حاجة ودلوقتي حاجة تانية خالص
هي هي نفس الحاجات بتاعة زمان لكن كل حاجة طعمها إتغير
زمان كان فيه حاجات بسيطة جداً ومشاعرها صادقة، حَسِيناها كلنا و وصلتلنا
رغم بساطتها إلا إننا كنا بنستمتع بكل شئ فيها
فى حين إننا دلوقتى بنعمل نفس الشي بطرق مختلفة لكن جمال ورونق وإحساس حاجات زمان إختفت
زمان ماكنش فيه قنوات طبخ وكنا بناكل أطعم أكل،
ماكانش فيه فيس بوك ولا واتساب وكانت المكالمة لقرايبنا والناس اللى بنحبهم ليها طعم تانى خالص،
ماكانش فيه وسائل مواصلات سهلة زى دلوقتي لكن كنا بنزور بعض وبنحس بلمة العيلة،
ماكانش فيه سفرة وقت الأكل لكن كان فيه طبلية يتلم عليها عيلتين وثلاتة،
الرسالة المكتوبة على الماسينجر عمرها ما هاتبقى في جمال وحلاوة الرسالة المكتوبة على ورقة،
ساندويتش الفول من المطعم عمرك ما هاتحس بحلاوته مقارنة بساندويتش الفول من على العربية،
تحس إن فيه زمن مفقود ما بين ده و ده،
ضحكة حد بتحبه على الموبايل عمرها ما هاتيجى فى جمال ضحكته وانت خارج معاه وقدام عنيك،
العيش المتسخن فى الميكروويف مش هايديك نفس إحساس العيش المتأَمر،
الحضن اللى بتصالح بيه أبوك و أمك مش زي حضنهم ليك يوم ما تنجح وتتخرج،
جزء عم اللي إنت قرأت بيه وانت إمام بعد ما تميت الثلاتين مش زى جزء عم اللى حفظته وانت عندك ست سنين،
تقريباً هي هي نفس الحاجات بس كل حاجة طعمها إتغير
زمان كان كل واحد فينا بيلاقي نفسه وسط أهله، مش تايه زى دلوقتي .
خليكم دايماً صادقين فى مشاعركم حتى لو إمكانياتكم بسيطة ..