مكانش العشم
شعر بالعامية : لشيرين رافت
كم مرة اتخذلت!
كم مرة اتقهرت!
وكان السبب
انك زودت العشم
حبتين
العيب عليك هما اكيد مش
غلطانين
انت اللي زودت النسب
من غير حسابات
ليه تقول على ده
صاحبي
ودول اخوات
جربتهم ؟!
طيب حسيت وقت الشدة
بقربهم ؟!
ووقت ما كنت عايز تحكي
قدرت تجري عليهم تشكي
ولا اكتفيت بالسكات !
كنت فاكر لما تزعل منهم هيراضوك
طيب خليك مستني
هما اصلا مش فاكرين انت مين
ايوه عادي
هانت عليهم عشرة السنين
افهم بقى واصحى من النوم الطويل
اركن عواطفك واجمد
ودوس على اللي يدوس عليك
مرتين
واعمل زيهم
مصلحتك اولا
واي حاجة تانية تيجي بعدين
عارف انك مش كده
بس حاول
هتعمل ايه؟!
وطالما اتحكم عليك تعيش في غابة
يبقى تكون
انت الاسد
انت الملك
مش ارنب تفترسه النمور.