"عندك كام سنة"
 |
شعر بالعامية بقلمي: شيرين رأفت
سألوني عندك كام سنة ؟!
فكرت أقول أي عمر فيهم
عمري الحقيقي، ولا الرقم؟!
أصل اللي مكتوب في البطاقة
ده مش عمري أنا !
أه صحيح هي عدت
السنين،
بس أنا
لسه هناك
لسه جوايا طفلة بالضفاير
شوية هوا جوا العيون
يدمعوها،
وكم بالون ملون
يبهجوها .
أه لسه بحب أركب عجل
وأنط الحبال
واتسلق الجبل.
جوايا طاقة لعب غير محدودة
زي العيال،
لسه بفرح لما الشمس تطلع
وأقدر امسك يوم جديد،
وأزعل قوي
لو غابت
كأنها
مش جايه تاني
وأنبسط بهدوم العيد
لسه الضحكة خارجة من القلب
رغم الهموم
لسه بحتاج طبطبة وقت الغيوم
وحضن يمتص الألم
وبسرعة يزول
فهل قدرتوا تحددوا عمري أنا
كم سنه ؟
