"قوليلي ليه"
كتبت/ شيرين رأفت
شعر بالعامية
صارحيني يا حبيبتي ...
قوليلي ليه ؟
المره دي معايا... غير كل المرات؟!
مشيت وقلبي ماسك فيكي
وعنية بتراجع
ذكرياتي معاكي
واللي فات...
أيوه والله
حنيني ليكي بزيادة قوي
كتير ......
غير كل المرات.
أه حقيقي ..قوليلي ليه؟!
حسيتي بيه ولا إيه ؟!
يمكن بدأتي تفكري ترجعيني،
تروي عطش وعجاف سنيني،
وتعوضيني عن اللي فات
أه ياريت
أصل أنا حسيت
وحتى قلبي ملهوف باشتياق.
يمكن كبرت
مبقتش أقدر عالفراق
خايف أبعد أكثر تنسيني
وتمحي الذكريات
لكن خلاص لو نويتي
تصالحيني
أوعديني
ان اللي جاي أحلى من اللي فات
وأن الغربة هتمر مرور الساعات
وفيكي هبني وأربي إبني
ان وطنك هي مصر الغالية
دور فيها
هتلاقي عندها كل الحاجات
هي الآمان
هي الحنان
هي السكن
والذكريات
هي الدفا مهما البرد كان .