" ضحية التختة الأولى"
شعر - شيرين رأفت
يا اما انتي فين
سيبانى؟!
مش كنتي
موصيانى
أجري بسرعة قوام
واقعد في الكرسي الاولاني
طيب
اديني سمعت الكلام
بس طلعتي مش لوحدك
حتى زمايلي
هما كمان
متوصيين
اه
بس بزيادة حبتين
قالولهم تقعدوا قدام
وعلى اليمين
ولو حد سبقكم
انتوا عارفين
تعملوا ايه وقتها
مش محتاجين
خد حقك يبني
حتى لو كان هو مين
المهم تقعد عاليمين
واهو جه ونفذ الوصية
هو كمان
سمع الكلام
هما يعني كام أمام
وكام يمين
انتوا كنتوا ايه متوقعين ؟!
قامت العاركة اللي هيه
ورحت أنا
فيها ضحية
الكرسي الاولاني
على اليمين.