"سيدة التوك توك" ست بـ 100 راجل.
كتب _ اشرف محمد
"هدى" تتغلب على ظروف الحياة بعد وفاة زوجها وتصبح أول سائقة توك توك بشبرا سيدة التوك توك بتعرض لمضايقات كل يوم..الحمل تقيل ونفسى ارتاح واجيب عربية اشتغل عليها
- عندى ولدين واحد فيهم اتفرم فى ماكينة مصنع الملابس وأمى تعرضت لبتر قدميها بسبب السكر
- السواقين بيكسروا عليا ويضايقونى كتير وفى ناس كتير ولاد حلال بيساعدونى لما كاوتش التوك توك يكون عاوز يتغي
- السواقين لما اجى اركب الزبون بيتلموا عليا ويأكلونى كأنى خدت رزقهم
فى أحد المواقف بميدان من ميادين منطقة شبرا الخيمة، تقف السيدة "هدى عبد النبى" التى أطلقنا عليها "سيدة التوك توك"، بجوار التوك توك الخاص بها فى انتظار الزبائن، ممن تنقلهم إلى الشوارع والأحياء الداخلية بأحياء شبرا الخيمة.
لم تكن تهتم بنظرات البعض لها من المحيطين والمضايقات التى تتعرض لها، ونظرات التنمر التى تتعقبها يوميا وهي تقود التوك توك الخاص بها، فقط كان اهتمامها الوحيد أن تجد ما يعينها على الحياة يوميا وتعود لابنتها ووالدتها العاجزة بالمال الذى يعينهم على قضاء الأيام .
" بعد وفاة زوجى اتبهدلت ومبقتش لاقيه مصاريف وفلوسى كلها تحت وصاحبة الشقة طردتنا".. بهذه الكلمات بدأت "هدى عبد النبى" حديثها لـ"اليوم السابع" وسط حالة من الحزن والبكاء كادت أن تسيطر عليها أثناء الحديث لتحكى مدى معاناتها اليومية وكيف دفعتها الظروف لتعمل سائقة على توك توك فى أحد الأحياء الشعبية بشبرا الخيمة .
وتقول التى لم تتجاوز الـ 40 عاما من عمرها :"بعد طردى من الشقة أجرت شقة واشتغلت على توك توك وتعرضت لمواقف كتير صعبة للغاية ففى مرة من المرات انقلبت بالتوك توك على الدائرى ومرة أخرى على أحد الكبارى وتعرضت لكسر فى القدم وكذلك ابنتى أيضا تعرضت لكسر فى قدميها".
وعن المواقف التى تتعرض لها يوميا خلال عملها بالتوك توك، قالت "هدى": بعيش فترة صعبة وبتعرض لمضايقات يومية وشتائم وفى يوم من الايام ركب أحد الأشخاص وكان بيشرب خمرة وقلى تعالى معايا والساعة ب 50 جنية".
وتابعت :" ذات يوم صدمتني سيارة نقل وربنا نجانى لكن التوك توك تحطم وكل يوم بتبهدل جدا بس الحمد لله على كل حال".
وأشارت إلى أن زوجها توفى منذ ما يقرب من عام وأربعة أشهر، ولديها ابن عمره 15 عاما وابنه عمرها 11 عام ، ووالدتها تعرضت لبتر قدميها لاصابتها بالسكر وتعرض قدميها لغرغرينة سكر، وهى تعتبر العائل الوحيد للأسرة .
وتابعت :"الحمل تقيل وكان لازم اشتغل على توك توك هي شعلانه صعبة بس حبيت التوك توك والشغل عليه وكنت معايا صنعه العمل على ماكينة خياطة أوفر وسنجر ولكن حالتى النفسية سيئة للغاية بعد وفاة ابنى فى المصنع الذى كنت أعمل فيه" ، مضيفه :"ابنى اتفرم من ونش الملابس فى المصنع وبعدها نفسيتى تعبت للغاية وأخدت أدوية لحد ما عدت المحنة على خير واتجهت لموضوع التوك توك ".
وقالت إنها فى البداية كان تعمل على التوك توك بالأجرة باليوم حتى استطاعت أن تقوم بشراءه بالقسط، لافته إلى أنها تخرج يوميا من الساعة 6.30 صباحا وحتى 9 مساء، وتعود فقط وقت الظهر للاطمئنان على والدتها وتبقى طوال اليوم على وجبة الإفطار حتى نهاية اليوم .
وعن المواقف التى تتعرض لها يوميا قالت "سيدة لتوك توك" : السواقين بيكسروا عليا ويضايقونى كتير وفى ناس كتير ولاد حلال بيساعدونى لما كاوتش التوك توك يكون عاوز يتغير وطول ما انا محترمة فى وسط الناس ربنا بيوقفلى ولاد الحلال.
وأضافت: التوك توك كل حياتى رغم كل التعب اللى بشوفه من السواقه طول النهار بس هو مصدر رزق ليا ولأولادى وأكل عيشى، مشيرة :"السواقين لما اجى اركب الزبون بيتلموا عليا ويأكلونى كأنى خدت رزقهم".
أما عن أحلامها، قالت "سيدة التوك توك": نفسى ارتاح وأجيب عربية اشتغل عليها تريحنى من التوك توك وأجيب شقة كويسة خصوصا انى ساكنه فى حجرة صالة وبنام على الأرض أنا وعيالى وكل جهازى بعته عشان اشترى التوك توك .
وتابعت : رغم كل دا بقول الحمد لله أنا فى نعمة وفى غيرى مش لاقيين الشقة اللى انا قاعده فيها ومستورة فيها أنا وعيالى ، لافته إلى أنها تحلم أيضا بأن يلقى أبناءها تعليم جيد.
واختتمت "سيدة التوك توك" : رسالتى لكل سيدة أرملة أو مطلقة لو حبيتي تشتغلى اشتغلى والشغل مش عيب ولا حرام طول ما انتى مش بتعملى حاجه غلط والست اللى بتكافح ربنا بيعينها.