اقرأ التفاصيل
recent
أخبار عاجلة

ايام زمان وجمالها

 ايام زمان وجمالها


ايام زمان وجمالها


بقلم  : مصباح محمد


كنا ايد واحدة وروح وقلب واحد

أمى بتسلم عليكم وبتقولكم عايزين بصلتين .

أمي بتسلم عليكم وبتقولكم ذوقوا الملوخية بتاعتنا

  أبويا بيقولكو هيفوت دلوقتي على عم صلاح علشان يزورو عمي حسين علشان عيان 

    ياابا عم خالد جارنا ضربني اكيد انت عملت حاجة غلط علشان يضربك 

      هاتي يابت الطرحة ألبسها علشان هنشر الغسيل

  اومال فين محمود .تلاقيه نام عند صالح جارنا علشان هم كانوا بيلعبوا مع بعض..

 مش هتاكل يا سيد ..لأ خالتي أم جون حطتلي آكل مع ابنها جون وأنا بكتب الواجب أنا وهو

. روحي يامديحة قولي لخالتك أم أحمد جارتنا عايزين ننشر بقيت الغسيل عندك علشان بلكونتنا مش مكفية .

 ماترزعش الباب ياابني واطلع براحة عالسلم احنا بقينا العشا والناس نايمين متقلقهمش 

  يلا يا ابراهيم فوت على مينا ابن الجيران وعدوا على سيد وانزلوا علشان تلحقو تلعبو فى العيد

  ياأمي ياأمي محمد جارنا خربش أخويا وعوروا في ذراعه ...معلش يابنتي هم بيتخانقوا وبيتصالحوا تاني روحي اندهيلوا علشان احطلو مكركروم .

 

ياااااااااااااااااااااااااا...

. .  دي حياتنا لما كنا عايشين

. من امتى ومحدش خبط على باب حد وطلب

طماطم أو بصل أو خبز او حتى نعناع 

  من امتى ومحدش زار جاره المريض أو حتى من غير مرض وشرب معاه الشاي وقرب منه 

  طب كام مصيبة حصلت لما عيل اتخانق مع جاره وممكن تطير فيها رقاب 

  طب كام مرة وصينا ولادنا ميزعجوش الناس ويحترموا وجود بشر عايشين معانا 

 صحيح كانت البيوت قديمة والحياة بسيطة لكن كانت القلوب حية والإنسان غالي

 فقدنا طعم الجيرة وفقدنا التواصل بالود والمعروف سبحان الله . كانت القلوب طاهرة  وجملة (أمى بتسلم عليكم)

كانت عبارة جميلة  بتعبر عن جمال المحبة .

  وجمال روح الجيران

 

 واليوم لم تعد الحياة لها طعم بعد الاستغناء عن الجار والسجن بين أربع حيطان

 

تعالوا نرجع نحب جيراننا ونتعرف عليهم 

 تعالوا نعتبر ولاد جيراننا زي ولادنا ونصبر على بعض

   تعالوا نفوت على بعض في الاعياد والمناسبات ولو نسلم من عالباب ونقول كل سنة وانتو طيبين 

 تعالوا لو جارنا مريض نزوره ونطمن عليه وندعيله 

 

 تعالوا نحترم بعض ونراعي مشاعر بعضنا ونحب للجار مانحب لانفسنا 

 تعالوا نبطل أذى لبعضنا بالازعاج والصوت العالي وإلقاء القمامة ورزع الباب ولعب الاطفال في اوقات غير مناسبة 

  تعالوا نضحك في وش بعض مع مراعاة الاحترام والحشمة والعفة

 يا ريت نرجع تاني يبقى لينا كبير نرجع ليه و يحكم بينا في المشاكل 

 تعالوا نعيش تاني زي زمان ونبقى روح وقلب واحد ونخاف على بعض زاي الأول .

google-playkhamsatmostaqltradent