الحاوي الجديد هو الصفقه الاهم للنادي الاهلي الموسم القادم
كتب - خالد عصام
اللاعب المعار لسموحه من الاهلي أحمد عبدالقادر
هو القطعة الناقصه فى خط وسط وخط هجوم النادى الأهلى
لاعب مهارى بطبعه يستطيع حل مشاكل كتير جدا داخل الملعب سواء فى وسط الملعب أو على الأطراف
يستطيع اللعب كصانع ألعاب بسبب رؤيتة المميزه وشادو استرايكر بسبب الحاسه التهديفية الكبيرة اللى عنده ويستطيع اللعب على الأطراف خصوصا الطرف الأيسر بسبب مهارته وسرعته
ميزة عبدالقادر إنه يقدر يشتغل فردى وجماعى يعنى لو المباراة مقفوله والمنافس متكتل أمام منطقة جزاؤة ومفيش خرم إبرة لأى لاعب إنه يخترق هنا هتلاقى الحاوى الجديد فى الميعاد وهيقدر يحل بالإسلوب الفردى
عبدالقادر مسجل 8 أهداف بدون ركلات جزاء وصانع 4 أهداف ومازال الموسم مستمر والقوس مفتوح لمزيد من الأهداف والصناعه
عنده ميزة كمان كانت موجوده عند تريكة وحاليا قفشه وهى برود الأعصاب
هل عشان بيلعب فى نادى مش جماهيرى وبلا ضغوط ولا ده طبيعته ؟
كل أهداف عبدالقادر أهداف ملعوبة أهداف فيها مهارة أهداف بتنم عن لاعب فذ قادم فى الطريق أهداف فيها طراز أوروبى حتى صناعته للأهداف بتكون بلمسه ولمسه ولعبه تحس ان الكورة سهله وبسيطه ومفيهاش تعقيد ولازم يحط التاتش بتاعه فيها
السؤال هنا بقي هل أحمد عبدالقادر يمتلك الشخصية القوية التى تؤهله للعب للنادى الأهلى وتحمل الضغوط سواء الضغوط الجماهيرية لو الجماهير رجعت المدرجات أو ضغوط اللعب على الفوز المستمر أو ضغوط اللعب على كل البطولات ؟
