ذكري رحيل المبدع الراحل
اسامه أنور عكاشة
كتبت / عزه حسن علي
صانع ابداعات ليالي الحلمية .أبوالعلا البشري .الشهد والدموع .زيزينيا .المصراوية . في المشمش .الحب وأشياء أخرى .النوة . أرابيسك .عصفور النار .وأدرك شهريار الصباح .ضمير ابله حكمت .كتيبة الإعدام . الهجامة من المقالات التي كتبت عنه
الملهم اسامة انور عكاشة.
مع مني الحسيني سنة 90 في حوار صريح جدا قال : ان المؤلف لما يشعر بشيء من الملل لازم يقف تماما عن الكتابة. وقال عملت الجزء الأول من ليالي الحلمية 18 حلقة.. والجزء الثاني 25 حلقة.. والثالث 30 حلقة والرابع هيبقى 30 حلقة بإذن الله... وقال انا عييت وتعبت في الجزء الثالث من ليالي الحلمية لان كنت بقعد اكتب (ساعتها من غير لابتوب) من 8-10 ساعات وجالي التهاب حاد في فقرات القطنية ولازمت الفراش فتره... وقال انه صعب تنجر لطلبات الممثلين لانها مبتخلصش...وقال ان مسلسل انا وانت وبابا في المشمش منجحش لان توقيت عرضه ظلمه (تخيل ان مسلسل زي ده لحد دلوقتي بيتعرض وبيتشاف يكون فشل ومؤلفه هو اللي يقول ده ويعترف) وقال انه أثناء عرض مسلسله لازم ينزل الشارع وكان بيروح يقعد على قهوة في الناصرية والناس مش عارفاه ويقعد يتابع ردود افعالهم مع المسلسل (من غير فيسبوك ولا تريندات مدفوعه)
في حوار ليه سنة 2005 قال : انا بستمتع بكتابات زمايلي زي محفوظ عبدالرحمن ويسري الجندي ووحيد حامد ومحسن زايد... وقال انه لما سافر يشتغل في الكويت (في السبعينيات) مكملش كام شهر ورجع ومستحملش الغربة رغم فلوسها الكتير في الوقت ده... واكتشف ان حنينه للاماكن وعشقها في مصر اكبر من اي حاجه.
تخيل ان مؤلف بيعمل مسلسل مثلا 13 او 16 حلقة.اللي هو دلوقتي بقي مقرر علينا يا 30 يا 60
الراية البيضاء 16 حلقة.
انا وانت وبابا في المشمش 13 حلقة.
عصفور النار 15 حلقة.
ضمير ابله حكمت 15 حلقة.
ارابيسك 41 حلقة.
ابو العلا البشري ج1،،،،،15 حلقه.
الشهد والدموع ج1 16 حلقة.
المؤلف المحترم اللي بيحترم زمايله. المؤلف الوحيد اللي قال ان مسلسله فشل او منجحش. المؤلف اللي بيحترم عمله ومبيسيبش دماغه للممثلين وطلباتهم بتكبير ادوارهم. المؤلف المثقف اللي اتربي في بيت من صغره بيقرا كتابات المنفلوطي ولطفي السيد والعقاد وطه حسين.
اسامه انور عكاشة اللي فهمنا منه يعني ايه انواع الشخصيات ومدى تأثيرها.اللي عرفنا منه وسائل التعبير غير اللفظية ولغة الاشارة والحركة الصامتة. اللي عرفنا الفكرة والحدث والحبكة بكل انواعها.اللي فهمنا نظريات الصراع الاربعة. اللي فهمنا دراما المكان الزمنية المرتبطة بحقبة او عصر معين.اللي ترجم تعاريف ارسطو للدراما عالورق المصري... اللي عكس تاريخ مصر في ادق مراحلها في ليالي الحلمية. اللي بنى الخيوط ودراما التوقيف والموسيقى في المشمش. اللي شرح الشخصيه الرئيسية والمحورية في ابو العلا البشري وبلورها في نظرية المُثقف المُحبَط. اللي دخل بنسيج التراجيدي والميلودراما في الشهد والدموع. اللي عرفنا علي ايديه يعني ايه سيناريو وتأليف.
