مواجهه صعبه في نصف نهائي افريقيا وتحليل شامل للاعبين الترجي
كتب - خالد عصام
الترجي بيلعب بطريقة ٤-١-٤-١ اللي بتتحول دفاعيًا بنزول لاعب وسط مهاجم لمساندة كوليبالي
حارس المرمى معز بن شريفية حارس عنده كتير من الأخطاء وخصوصًا في طريقه تعامله مع العرضيات والانفرادات وعنده مشكلة مستمرة في التعامل مع التصويبات.
ثنائي قلب الدفاع فيهم تباين مرعب يعقوبي ٣٠ سنة اللي عنده مشكلة كبيرة في التدرج بالكرة متوسط دقة تمريرات يعقوبي ٨١ ٪ والضغط عليه سهل جدا تستخلص الكرة نتيجته خصوصا انه بيمرر عرضي كتير وبالضغط ممكن تستخلص وتسجل بانفراد
يعقوبي عمل ١١ فاول وده رقم كبير جدًا بشوف انه بيعكس تهور اللاعب وده كمان يخلينا ممكن لو محمد شريف تعامل بذكاء ياخد ركلة جزاء . وعلى مستوى القدرات الدفاعية يعقوبي فاز ب ٧٠ كرة وده رقم ضعيف جدا. . لو حطينا يعقوبي في مقارنة مع بانون هنلاقي بانون بيتفوق في كل حاجة التمرير دقة ٩٢ ٪ واستخلاص الكرة ١١٤ مرة
على الجانب الأخر عبد القادر بدران الجزائري مدافع الترجي من اقوى المدافعين داخل القارة. بدران دقة تمريره ٨٧ ٪ ولكن استخلص ١٣٧ كرة وده تقريبا اعلى رقم في البطولة واللاعب جيد جدا في الرقابة والتمركز
الظهيرين النقاز والياس شتي بيتميزوا بانهم عندهم قدرات هجومية مميزة جدا ولكن دفاعيا عندهم مشاكل كتير في الارتداد. هجوميا النقاز صنع هدفين وعمل ٤٩ عرضية والياس لم يصنع ولم يسجل وعمل ٢١ عرضية. الثنائي مثالي لطاهر والشحات في الحالات الهجوميك
كوليبالي هو أهم لاعب في خطة الترجي لانه بيكون مطلوب منه يغطي مساحات كبيرة جدا وعشان كده بيكون في فراغات مرعبة في المساحة اللي خلفة وامام قلبين الدفاع ودي المباراة المثالية لان في المكان ده يتواجد لاعب رقم ١٠ زي قفشة لاستغلال النقطة دي
نيجي بقى لمفاجأة الترجي في البطولة وأخطر لاعبي العمق وهو محمد بن رمضان لاعب بيجيد التحول لمهاجم ثاني وبيجيد التصويب وبيجيد الاختراق من العمق ٢١ سنة فقط ولكن سجل ٥ اهداف وصنع هدف وله ١٥ محاولة على المرمى و ١٣ مراوغة وكل دي ارقام مميزة جدا. لازم يكون في صغط عليه من السولية وديانج بمجرد استلامه الكرة ومينفعش يدخل ال box بدون رقابة
غيلان شعلالي وبن غيت واحد منهم بيشارك جنب بن رمضان. ارقام الثنائي متقاربة جدا ولكن الشعلالي اقوى دفاعيا استخلص ٧٤ كرة مقابل ٥٧ لبن غيت
جناحين الترجي بشوف ان دي اقل نسخ انيس البدري صنع هدفين ولم يسجل اهداف محاولة صحيحة واحدة فقط على المرمى من بداية البطولة
ولكن الجناح الأخر حمدو الهوني هو من افضل الاجنحة داخل افريقيا ولكن هو بالنسبالي اقل كتير من جناح زي سفيان رحيمي لاعب الرجاء خصوصا ان فاعليته البطولة دي اقل كتير صنع هدف واحد وسجل هدف واحد وله ٤ محاولات فقط على المرمى ولكن هو افضل لاعب عنده قدرة على المراوغات ٢٣ مراوغة
مهاجم الترجي خالد عبد الباسط هو لاعب بدنيا فقط مخيف وبيفوز بالالتحامات والكرات الهوائية غير كده قدرات تهديفية سيئة جدا. هدف واحد سجله من ١٢ محاولة ومن اقل الاجانب اللي دخلوا الترجي
في النهاية بشوف ان باستثناء الرباعي بدران والنجاز وبن رمضان والهوني فاي مقارنة في مركز تاني فيها تفوق لصالح الأهلي.
