يورو 2020 يقسو علي امبابي بالخروج مبكرا من البطوله
كتب - خالد عصام
- في الحقيقة اللي حصل ل لاعب عنده لسة ٢٢ سنة زي " مبابي " في يورو ٢٠٢٠ ده اصعب حاجة نفسيا و ذهنيا ممكن تحصل ل لاعب صغير زيه و لاعب حجمه كبير اوي في كرة القدم زيه
- مبابي اللي سجل ٤ اهداف في كاس العالم ٢٠١٨ و كان ليه الفضل الكبير ان فرنسا تعدي من مباريات زي بيرو
والأرجنتين حتي كمان في النهائي قدام كرواتيا ظهر بشكل كويس اوي ، لاعب ساعتها كان عنده ٢٠ سنة في بداية عمره عنده موهبة كبيرة و بيساعد منتخب بلده انهم يجيبوا كاس عالم ، اعتقد مبابي كان الحافز عنده كبير اوي انه يكون اسطورة فرنسا المستقبلية و ياخد أماكن و تاريخ لعيبة زي " زيدان و هنري و حتي بلاتيني "
- لكن اللي حصل في يورو ٢٠٢٠ بالنسبة ل مبابي هو يعتبر كابوس كبير في حياة مبابي ، مبابي كان ناقصله في البطولة دي انه يضيع ضربة جزاء حساسة اوي زي بتاعة امبارح و يبقي سبب من ضمن أسباب في خروج فريقه المرشح للبطولة بدري بدري من دور ال ١٦ عشان ياخد جائزة " أسوأ لاعب في بطولة يورو ٢٠٢٠ " ..
١ - مبابي سدد ١٤ تسديدة في ٤ ماتشات بدون ان يسجل اهداف اكتر من اي لاعب اخر في يورو ٢٠٢٠ ..
٢ - مبابي تاني اكتر لاعب ضيع فرص محققة للتسجيل " ٤ " ، موراتا الأكتر بس ب ٦
٣ - ضيع ضربة جزاء حساسة أدت الي خروج فريقه
٤ - ولا هدف في اليورو ، و خرج ب أسيست يتيم
لك ان تتخيل يورو ٢٠٢٠ عملت ايه في مبابي اللي كان عنده حافز كبير اوي بعد بطولة كاس العالم ٢٠١٨ انه يكمل مسيرته مع فرنسا و يصبح مستقبلا احسن لاعب في تاريخها !! ..
كمان مبابي محطوط في قائمة فرق كبيرة اوي زي ريال مدريد و برقم كبير اوي ، تخيل بعد يورو ٢٠٢٠ اسمه و رقمه في السوق هيحصلهم ايه !! ..
يمكن ديشامب طريقته التكتيكية متخلفة ، لكن بص علي ال ٤ ارقام اللي فوق هتلاقي مبابي وصلتله كرات كتير و لكن بدون اهتزاز شباك ..
لكن يورو ٢٠٢٠ هو درس كبير اوي للموهبة الكبيرة صاحب ال ٢٢ عام ، هيتعلم من يورو ٢٠٢٠ يكسب خبرة ازاي يقوم بعد واقعة كبيرة ، هيتعلم من يورو ٢٠٢٠ يكسب خبرة القيادة و ان كل الشخصيات القيادية في عالم كرة القدم وقعت كتير في الاول ، لكن اتعلموا من ده لحد ما اثبتوا نفسهم أشخاص قيادية حقيقية ، و بما ان رونالدو هو المثل الاعلي ل مبابي و ان يورو ٢٠٠٤ اللي خسر فيها رونالدو النهائي بعمر ١٩ سنة هيا نقطة انطلاق رونالدو المليان إنجازات و مليان قيادة و مليان نجاح ، اعتقد مبابي لازم ياخد يورو ٢٠٢٠ نقطة انطلاق زي ما مثله الاعلي عمل بالظبط عشان نشوف مبابي مستقبلا مليان إنجازات و قيادة و نجاح لانه موهوب و يستاهل